Гьюрматлу ватанагьлийир!
Мялум вуйиганси, 1949-пи йислан башламиш дапIну, 90-пи йисаризкьан, дагъустандин имбу чIаларииндиси, табасаран чIалнииндира литературайин альманах чапдиан удубчIвури гъабхьнийи. Дидихьна вуйи маракьлувал вари табасаран халкьдин – жямяаьтлугъдин, мялимарин коллективарин, студентарин, мектебариъ заан классариъ урхурайи баяр-шубарин – аьхюб вуди гъабхьну, фицики альманах табасаран халкьдин литературайин майдан вуйи.

 

Жюрбежюр далилар себеб духьну, 1990-пи йисарихъан журнал чапдиан адабгъувал дебккнийи. Анжагъ дурарихьан ихь багъри литературайин артмиш’вализ тясир апIуз гъабхьундар. Табасаран литературайи чан рякъ дурумлуди давам апIури гъабхьну.
Журнал чапдиан адабгъувал цIийикIултIан башламиш апIбан бадали, ихь жямяаьтлугъдин вакилар республикайин кIулиъ айидарихьна илтIикIну. Дурар табасаран халкьдизра чан литературайин журнал чарасуз лазим вуйивалин гъаврикк ккауз удукьувалин натижайиъ «Литературайин Табасаранди» чан цIийи уьмур ккебгъра. Гьамусдихъан тина хъюгъну, кьюб вазлик сабан удубчIвури, «Литературайин Табасаран» журнал гьяракатнаъ хьибди. Йискьубаъ йирхьуб нумра адагъури, ихь вари шаирарин, писателарин дерин, бажаругълу эсерар журналин машариъ чап апIуз чалишмиш хьидихьа.
Урхрудар, машгьур табасаран шаирарин, писателарин поэзияйин, прозайин, драматургияйин эсерарихъди сабси, литературайин критикайихъди, тарихдикан, чIалнакан вуйи мялуматарихъди ва литературайин майдандиин шаирвалин сабпи ликар алдагъурайи жигьил авторарин яратмишарихъдира таниш апIидихьа.
Журнал почтайиъди гъадабгъуруш, подпискайин кьимат гьацI йисаз (индекс: 73908) – 193 манатна 14 кепек, сад йисаз (индекс: 63335) 386 манатна 28 кепек ву.
Аьлава мялуматар +7(963) 375-19-45 телефондин нумрайиз зенг дапIну, гъадагъуз шулу.