Дагъустандиъ 2021-пи йисаз 59 ясли-багъ тикмиш апIиди.
РД-йин образованиейин ва илимдин Министерствойиан учуз туву мялуматариинди, гъябгъюрайи ва гъюру йисан республикайиъ мектебдиз улихьна вуйи образованиейин гъурулуш рябкъюри яркьу хьибди. БицIидарин яслйир-багъар «Демография» милли проектдин ва Дагъустан Республикайин инвестицйирин программайин дахилнаъди тикмиш апIуз планламиш дапIна. Му тикилишариз федералин ва республикайин бюджетариан 8,2 миллиард манат жара апIиди.
Шубуд йисандин арайиъ жюрбежюр йишвариъ цIийи тикилишар арццди. Думу багъариъ 9 агъзуртIан артухъ бицIидариз йишвар хьиди.
Гъийин йигъаз ихь рес-публикайиъ бицIидарин багъдиз гъягъюз электрондин къайдайин нубатнахъ 2 вазлилан 3 йис’ина яшнахъна дуфнайи 2 агъзур ва 3 йислан 7 йис’ина яш айи 13 агъзуртIан артухъ бицIидар дийигъна. БицIидарин багъариъ йишвар адрувалин ва региондиъ мектебдиз улихьна вуйи образованиейин тешкилатар гьуркIри адрувалин асас себеб – аьхиримжи йисари бабкан шулайи бицIидарин кьадар артухъ дубхьнайивал ву.
Му месэла гьял апIбан бадали, РД-йин образованиейин ва илимдин Министерствойи аьлава уьлчмйир кьабул апIура, гьюкуматдин дару секториз (хусуси касарин багъар) кюмек тувра. Улихьна йисари бицIидарин багъар вуди, хъа гьамусяаьт жара себебариз ишлетмиш апIурайи дараматар муниципалин гьюкмарин кIулиъ айидарин кюмекниинди кьяляхъ гъадагъура.
