Гьаму йигъари РД-йин сагъламвал уьбхбан министр Жамалудин Гьяжиибрагьимов чан гюзчиваликкна тувнайи Табасаран райондиз гъушну ва гьадму райондин мектебар урхбан цIийи йисахьна гьязур хьпан гьякьнаан вуйи яркьу совещаниейиъ иштирак гъахьну.
Республикайин «150 мектеб» проектдиъ иштирак шулайи Табасаран райондин 12 мектебдиъ расвалин ляхнар ва гьацира НичIрас гъулан мектебдиъ гъахурайи тикилишчивалин ляхнарра аьхирихъна гъюра, хьуб мектебдиъ образованиейин «Точка роста» центрар арццра. Багахь гележегдиъ Табасаран райондин Хюрикк ва Туруф гъулариъ кьюб типовой мектеб дивуз планламиш дапIна.
РД-йин сагъламвал уьбхбан министрин гафариинди, гюзчивал гъабхру органари анжагъ журум апIбан уьлчмйир иливувал дюз дар, агьалйирин яшайиш мюгькам апIру ва практикана методика жигьатнаан чарасуз лазим вуйи кюмекнан месэлйир гьял апIру рякъярин гъайгъу дизигну ккунду. Бязи месэлйир мектебдин, гъулан жямяаьтдин кьувватариинди гьял апIуз шулу, мисалназ, цIа кабхъувалин хатIасузвал уьбхбан вая электрикдин йирси симар гьюдюхбан ва гьацдар жарадар.
Табасаран райондин глава Мягьямед Къурбановди къайд гъапIганси, мектебариъ цIа кабхъбан хатIасузвал уьбхюрайивал гьисабназ гъадабгъну, «150 мектеб» проектдиъ кьяняаьт гъапIу 3,5 миллион манат гьаму цIийи урхбан йисан улихь дийигъу сабпи учIру месэлйир гьял апIбаз ишлетмиш гъапIнийиш, хайлин кюмек хьибдийи.
Багарихьди НичIрас гъулаъ тикмиш апIурайи цIийи мектеб абццуз планламиш дапIна. Му месэла гьял апIбаъ улихьнаси райондиз гъафи РД-йин Правительствойин Председателин сарпи заместитель Гьяжимягьямед Гьюсейновра кюмек гъахьну.
