Гьаму йигъари РД-йин Правительствойиъ РД-йин премьер-министр Артем Здуновдин регьберваликкди Дагъустандин мектебериъ гьюкуматдин имтигьнар гъахбан натижйириз бахш дапIнайи заседание кIули гъубшну.
Заседаниейиъ асас доклад хьади РД-йин образованиейин ва илимдин министр – РД-йин Правительствойин Председателин заместитель Уммупазиль Уьмарова удучIвну гъулхну. Дугъу региондин аьтрафариин ЕГЭ къайда чIур дарапIди гъубхуваликан гъапну.
Гъябгъюрайи йисан Дагъустандиъ 14 предметдиан 12452 выпускникди ЕГЭ тувну. КIулди Гьюкуматдин аьхиримжи аттестацияйиъ 43992 кас иштирак гъахьну. Имтигьнар тувуз 74 пункт тешкил гъапIнийи. Вари пунк-тар онлайн къайдайин видеойин гюзчиваликкна гъадагънайи.
ЕГЭ тешкил апIбаъ 4386 кас иштирак гъахьну. Имтигьнарин ляхнар ахтармиш апIуз предметарин камиссйириан 465 эксперт жалб гъапIну.
Уммупазиль Уьмаровайи къайд гъапIганси, вари предметариан 80 ва артухъ баллар гъадагъуз гъабхьидарин кьадар 2616 кас ву. Мидланра гъайри, жюрбежюр предметариан 24 ученикдихьан 100 балл гъазанмиш апIуз гъабхьну. Вари заан балларин ляхнар федералин дережайиъди ахтармиш ва Рособрнадзори тасдикь гъапIну.
Гьаму йисан 873 выпускникди мектеб гъизилин медализ ккудубкIну (2018-пи йисан 1359 кас вуйи). Хъа 825 выпускникдихьан ЕГЭ саб предметдианра тувуз гъабхьундар. Дурар аттестатар адарди гъузну. Думу жигьилари имтигьян гъябгъюрайи сентябрь вазлиъ нубатнан ражари тувди. Ва му улупбар лап ис хьиди кIури, миж кивурхьа.
