Сентябрин вазлин 2-пи йигъан РД-йин сагъламвал уьбхбан министр Жамалудин Гьяжиибрагьимов Табасаран райондин кьялан больницайиз гъушну.
Ич газатдин мухбириз муниципалитетдин мялуматарин гъуллугънаан хабар тувганси, Табасаран райондин глава Мягьямед Къурбановдихъди, РД-йин Халкьдин Собраниейин депутат Алавудин Мирзабалаевдихъди ва Табасаран райондин кьялан больницайин кIулиъ айи духтир Авсеретдин Мирзабеговдихъди министр больницайиъ кIули гъахурайи расвалин ляхнариз гъилигну. Больницайин хирургияйин ва сарикан тмунурикна тарагъру уьзрарин отделенйириъ расвалин ляхнар кIули гъахура. Жамалудин Гьяжиибрагьимовди, улупнайи къайдйириз асас вуди, деврин вари тIалабр тамам дапIну ккуниваликан гъапну. Думу гьацира кьялан больницайиъ лихурайи медицинайин пишекрарин коллективдлихъди гюрюшмиш гъахьнийи. Духтрари министриз жюрбежюр суалар тувнийи.
Думу гюрюшдин кьяляхъ, рес-публикайин сагъламвал уьбхбан Министерствойин кIулиъ айир Кьулиф гъулан фельдшервалин пункт ва Жулжагъ гъулан духтирвалин амбулатория ахтармиш апIуз гъушну. Жулжагъ гъулан амбулатория тикмиш дапIну цIиб йисартIан даршра, думу рас апIбан ляхнар лазим вуйи гьялнахъна дуфна. Министри духтрарихъди медицинайин идарйирин гъийин гьялнакан, гьял дарапIди гъузнайи месэлйирикан, дармнарихъди тямин апIуваликан сюгьбатар гъухнийи.
Гюрюшарин натижйир йивури, Жамалудин Гьяжиибрагьимовди муниципалитетдин глава Мягьямед Къурбановдиз, райондин агьалйир медицинайин ужуб кюмекнахъди тямин апIбан месэлйириз фикир тувбаз лигну, чухсагъул мялум гъапIну.
КIваина хурача, Табасаран райондин кьялан больница тикмиш гъапIхъан мина дараматдиъ бинайиан расвалин ляхнар духнадайи. Гъюру йисан райондин поликлиникайин кьюбпи пай тикмиш дапIну ккудубкIбанди ву. Дидин гьякьнаан министри гьаму йисан майдин вазлиъ райондин больницайиз гъафиган гъапнийи.
