Гьаму йигъари Табасаран райондин Хархни гъул’ан вуйи Ватандин Аьхю дявдин иштиракчийин ачIни хпир Муминат Аьгьмедовайиз хусуси хал масу гъадабгъуз субсидйир тувну.

Сентябрин вазлин 4-пи йигъан Табасаран райондин глава Мягьямед Къурбановдин табшуругъниинди «Табасаран район» МР-ин главайин заместитель Заур Мусаев ва Табасаран райондин УСЗН-дин 1-пи разряддин пишекар Низами Аьгьмедов Муминат Аьбдурягьмановна Агьмедовайихьна субсидйир тувбан шагьадатнама хьади гъушну.

Муминат Аьгьмедова – Ватандин Аьхю дявдин иштиракчийин ачIни хпир – Табасаран райондин Хархни гъулаъ яшамиш шула. Дугъаз хусуси хулар масу гъадагъуз 1 миллионна 98 агъзурна 792 манат жара гъапIну.

КIваин апIуз ккундучуз, 2008-пи йисан 7-пи майдиъ 714-пи нумрайиккди кьабул гъапIу «1941-1945-пи йисарин Ватандин Аьхю дявдин ветеранар хуларихъди тямин апIбан гьякьнаан» Урусатдин Федерацияйин Президентдин Къанундиин биналамиш духьну, Ватандин Аьхю дявдин ветеранар, гьацира игьтияж айидарси гьисабназ гъадагънайи Ватандин Аьхю дявдин иштиракчйирин (инвалидарин) ачIни хпар федералин бюджетдиан социалин субсидйир тувбиинди тямин апIура. Сар касдиз 38 квадрат улупна.

Муминат Аьгьмедовайи ва дугъан багахьлуйири чпиз фикир ва кюмек тувбаз райондин кIулиъ айидариз ва РД-йин зегьметнан ва социалин артмиш’валин Министерствойин вакилариз аьхю чухсагъул мялум гъапIну.

Жулжагъ гъулан поселениейин глава Шагьмердан Гьясанаваеди къайд гъапIганси (Хархни гъул думу поселениейин дахилнаъ а), Муминат Аьгьмедовайиз 4 риш а. Гьамусяаьт думу Хархни гъулаъ чан сану шуран ва язнайин хизандихъди яшамиш шула. Муминат баб гьадму саб вахтна халачйирин фабрикайиъ гъилихну, колхозариъ ва совхозариъ жюрбежюр ляхнариин машгъул вуйи.

Шагьмердан Гьясанаваевди Муминат бабаз ва думу уьрхюрайи язнайиз сагъ’вал, хушбахтвал, ярхи уьмур ккун гъапIну.