Сентябрин кьюбпи йигъан Хив райондин ЦIудухъ гъулаъ цIийи мектеб абццну. Думу серенжемдиъ Урусатдин МЧС-дин Дагъустандиъ айи КIулин управлениейин начальник Нариман Къазимягьямедов, Хив райондин глава Ярмет Ярметов, РД-йин Гьисабнан палатайин отделин начальник Бейдуллагь Мирзоев ва хайлин жара касар иштирак гъахьну.
Мектеб муниципалин бюджетдин дакьатарихъ тикмиш гъапIуб ву, ва душваъ 80 ученикдиз деъру йишвар а.
Серенжем ачмиш апIури, ЦIудухъ гъулан мектебдин директор Сефижат Наврузбеговайи къайд гъапIганси, му серенжем баяр-шубариз кьюб маш-квар гъабхьну – аьгъюваларин Йигъ ва цIийи мектеб абццувал. Сефижат Наврузбеговайи, тебрикнан гафарихъди сабси, му мектеб тикмиш апIбаз рякъяр гъагу, улихьди Хив райондин главади лихури гъахьи Бейдуллагь Мирзоевдиз, дугъан табшуругъар тамам гъапIу Хив райондин гьамусдин глава Ярмет Ярметовдиз, спонсорариз ва тикилишчивалин ляхнар кIули гъахурайи тешкилатдин кIулиъ айи Манаф Аьгьмедхановдиз чухсагъул мялум гъапIну.
Чан нубатнаъ Ярмет Ярметовдира чпин ляхин мюгькамди ва вахтниинди тамам апIбаз лигну, Манаф Аьгьмедханов кIулиъ ади «Уют-строй» ООО-йин вари гъуллугъчйириз чухсагъул мялум гъапIну, хъасин дугъу мектебдин ученикар, мялимар ккебгърайи урхбан цIийи йисахъди тебрик гъапIну. «ЦIийи мектебдиъ урхурайи баяр-шубари гележегдиъ райондин ва республикайин артмиш’валик баркаллу пай кивур кIури, умудлу вуза. Аьгъювалар гъадагъуз вахт гьяйиф мапIанай. Фицики гъи гьаму мектебдиъ учву гъадагъу аьгъюваларикан ичв гележегдин уьмур ва мумкинвалар асиллу хьиди», – гъапнийи Ярмет Ярметовди.
Нариман Къазимягьямедовди чан удучIвну улхбаъ аьгъюваларин Йигъ аку машквар вуйиваликан гъапну. «Гъи республикайин кIулиъ айидари образованиейин гъурулушдиъ модернизацияйин аьхю ва мянфяаьтлу ляхин гъабхура. Ва ихь мектебарин классариъ учву гъадагъу аьгъювалар ихь районарин, республикайин ва уьлкейин артмиш’валин бина хьибди. Гьаму йисари «100 мектеб» ва «150 мектеб» проектарин кюмекниинди республикайин 250 мектебдиъ расвалин ляхнар кIули гъухну. Гъи республикайиъ хьуб цIийи мектебар арццра, шубубсана мектеб тикмиш дапIну ккудукIура. Ичв гъулаъ мектеб тикмиш апIувал – Хив райондин кIулиъ айидарин зегьмет гъабхьну», – къайд гъапIну Урусатдин Дагъустандиъ айи МЧС-дин кIулиъ айири.
Серенжемдиъ Бейдуллагь Мирзоев, Хив райондин образованиейин отделин начальник Назаряли Тарланов, «Уют-строй» ООО-йин генеральный директор Манаф Аьгьмедханов ва жара касар удучIвну гъулхнийи.
«2011-пи йисан райондиъ 2025-пи йисазкьан вуйи Хив райондин социалинна экономикайин артмиш’валин программа кьабул гъапIнийи. Гьар йисан улихь дийигънайи читин месэлйир гьял апIбан рякъяр агурайча. Сад йисан ЧIиллихъар ва ЦIудухъ гъулариъ кьюб мектебдин шибритIар ирчунча. ЧIиллихъарин мектеб лапра гъагъи гьялнаъ айивализ дилигну, сифте думу тикмиш апIуз йикьрар гъапIнийча. Гъи ЦIудухъ гъулаъ мектеб абццрайивалиин узу кIваантIан шад вуза. Думу мектебар тикмиш апIбак, ерли бюджетдинси, спонсорарин ва гъуларин ватанперес касаринра важиблу пай ка», – гъапнийи Бейдуллагь Мирзоевди.
Серенжемдин аьхириъ хялар ва уч духьнайи касар цIийи мектебдин классариз лигуз гъушнийи.
