Ццийин 3-пи сентябриъ, 2004-пи йислан мина Бесландин 1-пи нумрайин мектебдиъ гъабхьи гъазават фикриъ уьбхюри, магьа 15 йис тамам гъабхьну.
КIваин апIуз ккундузузки, 2004-пи йисан 1-пи сентябриъ вари 1130 касдихьна мектебдин гьяятдиъ завлан тIирхру жакьварси шадди, марцци фикрар, хиялар, ниятар кIваъ ади линейкайиин дийигънайи баяр-шубар, дурарин абйир-бабар, мялимар ва гъирагъдилан дуфнайи хялар 30-тIан артухъ Аллагь кIваин алдру, инсафсуз касарин яракьламиш дубхьнайи дестейи кьялаъ аъну. Дурар вари, малар-марччарси хъзигури, ургъри-ккургъри мектебдин спортзалиъ тIаънийи. Мушваъ ихь чвйир-чйирин убхъуз шид, ипIуз уьл, даахну нивкI адарди 2 йишвна йигътIан артухъ гъабхьнийи… Хиял апIарваки, 41-пи йисандин дявдин гьядисйир давам шула. Шубубпи сентябриъ инсафсузарин хилариан йивну гъийиху касарин майтар гъадагъуз МЧС-диан гъафи юкьур кас айи автобус гъябкъиган, душмнари хъанара яракьдиан йивуз хъюгънийи ва майтарин кьадар артухъ гъапIнийи. Саб вахтна спортзалин айитI гъачгъари ккебхнайи бомба жилиинди абхънийи ва гъутIубкIнийи. Думу гъутIубкIган, спортзалин цалиъ урхъ адабхънийи. Вари баяр-шубар спортзалин цал`ан адабхъу урхъ`ан тина гьергуз хъюгънийи. Гъачгъари дурариин гюлле уьлюбхнийи. Хъа жилижвуварин аьхюнубсиб пай дурари гьеле 1-пи ва 2-пи сентябриъ тIанкь гъапIнийи. Гъийихдарин кьадар 330-тIан зиина гъабхьнийи, дурарикан 130-тIан артухъ мектебдиъ урхурайи баяр-шубар вуйи. Мидланра савайи, урхурайдарин ва дурарин абйир-бабарин улихь, гюллдихь чпин мухрар гьивну, ФСБ-йиан ва МЧС-диан вуйи 30 гъуллугъчийин жанарра пуч гъахьнийи.
Хилар-ликариз ва жандин жюрбежюр йишвариз гъагъи зийнар гъахьи касарин кьадар 810 касдихьнакьан вуйи.
Сентябрин 3-пи йигъ вари шагьрарин, районарин, гъуларин мектебариъ гъагъи йигъси къайд апIура. Хив райондиъра мектебарин гьяятариъ айи ядиграрихъ кюкйир диври, саб дакьикьайин арайиъ ккебехъну дийигъури, ачухъ дарсар гъахури, классдин гъирагъдихъ вуйи урхбан дарсар, линейкйир тешкил апIури ва цалик керхру газатар гьязур апIури, думу пис гьядисйириъ гъийихдар вари фикриъ уьрхюра.
Мидланра савайи, Хив райондин глава Ярмет Ярметов кIулиъ ади, вари администрацияйин руководителаринра иштирак’валиинди райондин гъалибвалин паркдиъ Бесландин мектебдиъ гъабхьи дюшюш фикриъ уьбх-бан серенжем кIули гъубшну.
Ярмет Аьлиметовичди чан удучIвну улхбаъ думу инсафсуз касари чпин гардандиъ саб тахсирра адру, гьялал касариз туву жафйирикан, адабтIу гъазаватнакан ва багахьлуйириз гъабхьи зарарнакан гъапнийи. Улхбан аьхириъ урхурайдариз ва серенжемдин иштиракчйириз урхбан цIийи йис мубарак гъапIнийи ва ихь веледарин гъюзимбу гележег акуб, марцциб хьувал ккун гъапIнийи.
Серенжем аьхирихъна гъюри, гъалибвалин ядигарихъ кюкйир дивнийи.
Гъит, ихь хилариан кюкйирин кунцIар кам даришри, анжагъ ухьу дурар, кIул`ин аку зав алди, жигьилариз швушвар ча кIури, баяр-шубари дадйириз, мялимариз туври, хизандиъ сагъу веледар артухъ шули, шадвалин мянфяаьтлу серенжемариъ ишлетмиш апIру агьларикан ишри. Амин!
