Гъябгъюрайи йисан 18-пи сентябриъ Хиварин кьялан мектебдиъ кючюрмиш шулайи деврин литературайин кIубан ва зирек, аьхю гьярфналан вуйи шаир дишагьли Эльмира Аьшурбеговайин уьмриз ва яратмиш`валин рякъюз бахш дапIнайи литературайин серенжем кIули гъубшнийи.
Шаирарин юбилеяр тебрик апIури, литературайин ва чIалнан терефнаан мицдар серенжемар Хив райондин мектебариъ кми-кмиди кIули гъягъюра. Нубатнан литературайин вечер бадали ликар алдагъдарин кIулиъ Хиварин мектебдиъ бабан чIалнан ва литературайин дарсар киврайи мялим Гюлюзар Бегова айи.
Класс литературайин вечерихьна лазим вуйи къайдайиинди улихь деънайи гьязур дапIнайи. Шаирин китабарин гъварчар дивнайи, интерактив доскайиъ презентация дюзмиш дапIнайи, цалин газатар керхнайи ва кюкйирин кунцIарихьди дабалгнайи. Баяр-шубарира гьарури чпи гъабхурайи ролиз гъилигу палтар алахьну деънайи.
Гюлюзар Беговайи чан докладдиъ Эльмира Аьшурбеговайин уьмрикан ва яратмиш`валин рякъкан, гъийин деврин литература бадали Э.Аьшурбеговайи гъабхурайи ляхникан, дугъу жигьил шаирариз яратмиш`валин рякъюъ апIурайи кюмекнакан, ва гьацира ихь халкьдин театриъ дугъан творчествойиан диврайи спектакларикан ва жюрбежюр конкурсариъ дурари гъадагъурайи заан йишварикан ктибтнийи.
КIваин апIуз ккундузузки, аьхиримжи кьюд-шубуд йисан ихь халкьдин театриъ Эльмира Аьшурбеговайи дюзмиш дапIнайи «Эвелин дих» Кьалухъ Мирзайикан ва «Хабар тув ихь дустариз» Багьаудин Митаровдикан вуйи театрин спектаклар республикайиъ пешкешнан йишвариз лайикь духьна.
Шаирихъди Хиварин мектебдиз ихь литература, чIал, культура, хазна бадали ликар алдагъурайи касарин делегацияра дуфнайи. Шарафудин Дашдемиров, Сефижат Кьасумова, Сарида Семедова ва Рена Пирмягьямедова шаирин устадваликан ва аьяндарваликан удучIвну гъулхнийи. Чан улхбаъ Шарафудин Закиевичди гъапIнии: «Шиърар, ихтилатар шлихьан-вушра дюзмиш апIуз шулу, хъа Эльмира Аьшурялиевнайихьанси рифма ади, дерин мяна ади, саб гафниинди, урхруган иштагь шлу, жандилан зиз гъябгъюз гъитру эсерар дюзмиш апIуз анжагъ бикIбаъ чпин хатI гъибтру аьлимарихьантIан даршул. Эльмира Аьшурялиевна гъийин йигъан гьацдар аьлимарикан, шаирарикан, мялимарикан, устадарикан сар ву».
Гьацира литературайин вечериъ Хиварин кьялан мектебдин директор Физули Аьбдулязизовди, бабан чIалнан дарсар киврайи мялимар Тамила Аьлипашаевайи, Зульфия Шябановайи, Жахчабег Мурадовди, шаирин эсерар гъварчди гъадагъну, дурарин анализ гъапIнийи. Аьхириъ баяр-шубари шаирин шиърар кIваъланди гъурхнийи, мяълийир гъапIнийи ва спектакларин чIукIар улупнийи.
Серенжемдин аьхириъ Эльмира Аьшурбеговайи литературайин вечер тешкил гъапIдариз, дидиъ иштирак гъахьидариз чухсагъул мялум гъапIнии. Дугъу жара чIалариз илтIикIнайи чан шиърарикан гъулхнийи. Гьацира гьамусди чан хиларигъ гъяйи шиърарикан ва гележегдин планарикан гъапнийи. Улхуб аьхирихъна гъюри, алахьру мяракйир гьар вахтна анжагъ гьамци акудар хьувал ккун гъапIнийи. Табасаран культура, тарих, литература ва чIал бадали ликар алдагъурайи мялимариз, шаирариз, ужудар инсанариз, гъирагъдилан кюмек туврайи аьлимариз хъана хъуркьувалар ва ягъурлу рякъ ккун гъапIнийи. Шаири Хиварин мектебдин библиотекайизра чан китабар багъиш гъапIнийи.
Мидланра савайи, делегация райондин глава Ярмет Ярметовдихьна, хъасин райондин культурайин, спортдин, жигьиларин политикайин ва туризмдин отделин начачальник К.З. Къазиевдихьна хялижв гъахьнийи ва ихь цIийикIултIан девриз дуфнайи «Литературайин Табасаран» журналин подпискайин гьякьнаан лазим вуйи чарйир гъагнийи.
Йиз макьалайин аьхириъ пуз ккундузузки, мектебариъ туврайи маважибдиз, йислан-йисаз мектебариъ бабан чIалнаан кам апIурайи сяътариз дилигди, ихь закурин наслар бадали, багъри бабан чIал, чалнахъди культура, фольклорин тарих дурарихьди гьисс апIуз гъитрайи мицдар мялимариз ва дих гъапIиган мектебарихьинди илтIикIурайи шаирариз, ужудар касариз икрам вуйиз. Чухсагъул!
