Табасаран райондин 90 йисандин юбилейин серенжемарин дахилнаъди сентябрин кьюбпи гьацI’ан тина райондиъ спортдин жюрбежюр талитар кIули гъягъюра. Гьадму гьисабнаан футболиан, волейболиан, шашкйириан ва шахматариан, пучIу атлетикайиан, хилариинди кчIихбан жюрейиан турнирар гъушну.
Волейбол
ЦIиб улихьнаси Табасаран райондин Кьалухъ Мирзайин ччвурнахъ хъайи спорткомплексдиъ волейболиан талитар гъахну.
Талитариъ 1-пи йишв Хьарагъ гъулан волейболин командайи, 2-пи йишв – Ругуж-Хянягъ командайи, хъа 3-пи йишв – Жвулли гъулан командайи гъадагъну.
Футбол
Гьацира Хючна гъулан стадиондиин футболин турнирра кIули гъубшнийи. Турнир райондин гъулан поселенйирин командйирин арайиъ «Табасаран район» МР-ин культурайин, спортдин, туризмдин ва жигьиларин политикайин отдели тешкил гъапIуб вуйи. Спортдин талитариъ иштирак гъахьи хьуб командайи чиб-чпихъди гъуху гъизгъин женгарин натижйир гьамцдар гъахьну: сабпи йишв «Гурихъ гъулан совет» СП-йин «Гурихъ» кIуру командайи гъадабгъну, кьюбпи йишван сагьиб Хючна, ГьепIил, Ягъдигъ гъуларин ветеранарикан тешкил дапIнайи команда гъабхьну, хъа шубубпи йишв «Къужник гъулан совет» СП-йин «Къужник» кIуру командайи гъазанмиш гъапIну.
ПучIу атлетика
Сентябрин 18-пи йигъан Хючна гъулан стадиондиин пIучIу атлетика-йиан талитар кIули гъушну. Думу талитариъ иштирак’вал апIуз Табасаран райондин жюрбежюр гъулариан пучIу атлетикайиин машгъул вуйи спортсменар гъафнийи. Талитариъ 100 метриз жаргъбаан, 800 метриз жаргъбаан ва ярхлаз ергбаан райондиъ варитIан кIубан спортсменар тяйин гъапIнийи.
100 метриз жаргъбаан 1-пи йишв Гурихъ гъул’ан вуйи Тимур Авсетовди гъадабгъну, 2-пи йишв – Гали Гюгьрягъ гъулан агьали Межид Мурадовди гъазанмиш гъапIну, 3-пи йишв – Жулжагъ гъулан вакил Имран Уьмаровдиз гъабхьну.
800 метриз жаргъбаан 1-пи йишв Заан Гюгьрягъян вуйи Сабир Матаевди, 2-пи йишв – Заан Гюгьрягъ гьулан вакил Джамалудин Мирзаевди, хъа 3-пи йишв – Хючна гьулан агьали Жамал Жамаловди гъазанмиш гъапIну.
Ярхлаз ергбаан 1-пи йишв Алим Аьлимирзаевди (Хючна гьул), 2-пи йишв – Шамил Небиевди (ГьепIил гъул), 3-пи йишв – Мягьямедрасул Мягьрамовди (ЧвулатI гъул) гъадагъну.
Армспорт
Сентябрин 18-пи йигъан хилариинди кчIихбаан турнирра тешкил гъапIнийи. ВаритIан гужлидарстар спортсменарин арайиъ 1-пи йишваз Хючна гъул’ан вуйи Гьяжи Аьлимирзаев лайикь гъахьнийи. Кьюбпи йишван сагьиб – Мурад Гьясанов (Къужник гъул), 3-пи йишван – Сабир Матаев (Заан Гюгьрягъ) гъахьнийи.
Шахматар
Сентябрин 24-диъ Табасаран ра-йондин культурайин Хулаъ, шахматариан райондин турнир кIули гъубшнийи. Турнириъ 11 спортсмен иштирак гъахьнийи. Талитариъ иштирак гъахьи спортсменарин арайиъ, судйирин гьисабариинди, варитIан гизаф очкйир (10 очко) гъазанмиш гъапIу К. Абакаров (Пилигъ гъул) сабпи йишваз, 8 очко гъадагъу А.Ражабов (Пилигъ гъул) кьюбпи йишваз, 8 очкойин сагьиб К.Мазалаев (Хючна гъул) шубубпи йишваз лайикьлу гъахьну.
Пешкешнан йишвар гъазанмиш гъапIу спортсменар турнирин тешкилатчйири гьюрматнан грамотйирихъди ва медаларихъди, лишанлу гъапIну.
Шашкйир
25-пи сентябриъ Табасаран райондин культурайин Хулаъ урус шашкйириан турнир гъабхьну. Думу турнир сад йигъандин арайиъ кIули гъубшнийи. Душваъ иштирак хьуз Табасаран райондин жюрбежюр гъулариан варитIан ужуди шашкйир апIру касар гъафнийи. Турнириъ 1-пи йишв Хючна гъулан агьали Исмяил Исмяиловди гъадабгъну, 2-пи йишв – Ягъдигъ гъул’ан вуйи Аьли Гьясанбеговди гъазанмиш гъапIну, хъа 3-пи йишван сагьиб Мягьрягъ гъулан вакил Шихягьмед Аьбдулялиев гъахьну. Гъалиб гъахьидариз кубокар, медалар ва дипломар тувну.
