Татарстандин меркез Казань шагьриъ Булгарин исламдин академияйиъ докторантура ккудубкIу выпускникариз улихьнаси дипломар тувну.
Кьюд йисан урхбан ва диссертация уьбхбан кьяляхъ, исламдин илмарин докторвалин ччвур йирхьур касдиз тувну. Дурарин арайиъ ихь ватанагьли, Дагъустандин исламдин университетдин шариаьтдин илмарин мялим Табасаран райондин СертIил гъулан агьали Мугьяммад-Амир Мевлютовра а. Думу Дагъустан Республикайиъ исламдин илмарин сарпи варитIан жигьил доктор гъахьну. «Табасарандин нурар» газатдин редакцияйин коллективди, Мугьяммад-Амир Мевлютов му аьхю хъуркьувалихъди тебрик апIури, дугъаз мюгькам сагъ’вал ккун апIура. Гъит, дугъан дерин аьгъювалари ихь халкьдиз ва ихь диндиз хайир хри.
