Ихь девриъ техника артмиш хьувал лап зарбди улихь гъябгъюра. Йислан-йисаз цIийи аппаратар, улихьди ухьуз затра мялум дару шей’ар адагъура. Думу аппаратари, техникайин цирклиъси, ихь яшайишдиъра жюрбежюр месэлйир гьял апIура.

Аьхиримжи вахтна ухьуз рябкъюрайиганси, сумчрин мажлисдиъ видеофильм адабгъруган, завуз удучIвру аппаратар ишлетмиш апIуз хъюгъна. Думу аппаратар саб сумчриъ ваъ, хъа гизаф жара йишвариъра – разведка гъабх-руган, тикилишчивалин ва рас апIбан дестйири, жара идарйири ишлетмиш апIура. Лап багарихьди Урусатдин, Китайин, ОЭА-йин жюрбежюр компанйири дицисдар аппаратариъди инсанар саб йишвлан жара йишв’ина гъахуз хъюгъди. Думуган завуъ тIирхру аппаратарин кьадар гизаф хьибди. Гьаддиз, хатIасузвал уьбхбан бадали, 2019-пи йисан сентябрин 27-пи йигълан башламиш дапIну, 250 граммдилан 30 килограммдиина гъагъ айи тIирхру аппаратар гьисабназ гъадагъбан гьякьнаан цIийи къайдйир кьувватнаъ учIвра. Гьаму йигълан тина тIибхру аппаратдин эйсийи чан квадрокоптер Росавиацияйин гьисабнаъ тIапIну ккунду. Ватандашариз му ляхин апIуз 30 йигъ тувра.

Жвуван квадрокоптерин шикил йивну, почтайиъди ясана «Госуслуги» порталиъди хътапIувал лазим ву. Росавиацияйиан квадрокоптер гьисабназ гъадабгъувалин гьякьнаан тялукь нумра гъибди, гьадму нумра аппаратдик бикIувал лазим ву. Нумра алдарди квадрокоптер деебтувал къанунсуз ляхинси гьисаб шулу ва 50000 манатдиинакьан штраф апIувалин жаза тувру.
Къанундиз вафалуди гъузурхьа, гьюрматлу дустар!