Магьа нубатнан ражари ихь октябрин вазлин хьудпи йигъ дуфна. Му йигъан ухьу варидари  мектеб ва мялимар кIваин апIурхьа, фицики мектебдиз дурушур, мялимди дарс ктривур ихь арайиъ гьичра адаршул.  Мялимдикан фукьан асиллу вуш, гьарсариз аьгъяхьуз.

Мектеб — аьгъюваларин бина ву, хъа душваъ лихурайидар ихь гьюрматлу мялимар ву. Жямяаьтлугъдин арайиъ мялимдин кесптIан важиблу кесп гьичра адар. Ихь уьлкейин гележег мялимарин хилиъ а гъапишра, йиз кучIал даршул. Мялимди бицIидариз аьгъюваларихьна рякъ улупуру, фикир апIуз, гьисс апIуз, цIийи жюрейиинди гележег рябкъюз улупуру. БицIидариз аьгъюваларин шибритI ккивбан бадали, мялимдиз чазра дерин аьгъювалар, сабурлувал, пишекарвал ади ккунду. Гьелбетда, мялимдин пише лап гъагъидарикан гьисаб шула: аьхю жавабдарвал, кми-кмиди арайиз гъюру, кIул иццру апIру дюшюшар, гъизигу зегьметнахъан тувру цIибди вуйи маважиб ва хъана жарадар.  Хъа мялимдин улихь дийибгънайи месэла варитIан читинуб ву: абйир-бабари мектебдиз гьаънайи бицIириз ужудар аьгъювалар ва ужуб тербия тувувал. Хъа гъагъивализ дилигди аьхю аьшкьниинди мялимвал апIру гизаф инсанар ахьуз.

Аьхю духьнайи инсанарин арайиъ ккуни мялимдин сурат кIваин илимдру кас гьичра адаршул. Гъачай гъи гьарури, тебрикнан гафарин кьяляхъ, ихь аьгъюваларин бина ккиву касдин ччвур бикIурхьа.

Гьюрматлу вуйи мялимар! Ичв пишекарвализ, зигьимлувализ, кIван жумартвализ аьхю аферин! Гъит, гележегдиъ учвуз Аллагьди  мюгькам сагъ’вал, кIваъ айи ужудар метлебар кIулиз адагъуз мумкинвалар, мектебдиъ бажаранлу ва аькьюллу баяр-шубар тувричвуз, гъарашугъарин, абйир-бабарин ва вари жямяаьтлугъдин арайиъ гьюрматлу касар ишричву!