Октябрин 4-пи йигъан Табасаран райондин СикIухъ гъулаъ шадвалин мярака кIули гъубшну – спортдин жямяаьтлугъ майдан ачмиш гъапIну. СикIухъ гъулан агьалйири му шаду гьядисайиз райондин администрацияйин, образованиейин управлениейин, жигьиларин жямяаьтлугъ тешкилатарин вакилариз, республикайин жара шагьрариъ ва гъулариъ яшамиш шулайи жвуван гъуландариз теклиф дапIнайи.
Спортдин гизаф метлебар айи майдан «БицIи бюджетдин спортдин майдан» программайин дахилнаъди райондин администрацияйин ва гъулан жигьиларин жягьтлувалиинди тикмиш гъапIуб ву. Жикъи вахтнан арайиъ хайлин ляхнар кIули гъухну: майдан дюз гъапIну, дидлан симран сетка илтIибкIну, варидариз ккуни волейболин майдан гьязур гъапIну. Дидланра савайи, баскетболин щитарра, кьувватнан упражненйир апIбан алатарра дивбанди ву.
Хъа му ужуб ляхин цци Табасаран райондин 90-йис хьпаз тялукь вуди кIули гъубхуб вуйи. Москвайиъ айи дилаварчи кас, СикIухъ гъулан агьали Несредин Мягьмудовдира аьлава кюмек гъапIнийи.
«Ихь райондин гъулариъ арццрайи спортдин гьамцдар майднарикан му 16-пиб ву. Гьамциб ляхнихьна жара гъулариъра маракьлувал улупурайивали ихь жигьилариз спортдиин машгъул хьуз кIваантIан ккуниваликан кIура. Дурариз кюмек тувну ккунду», – къайд гъапIнийи Табасаран райондин глава Мягьямед Къурбановди спортдин майдан ачмиш апIбан мяракайиъ. Дугъу гьацира спортдин майдан тикмиш апIбаъ тафавутлу гъахьидариз грамотйирра тувнийи.
Урусатдин Президентдин грантдин гъалибчи, «БицIи бюджетдин спортдин майдан» проектдин автор ва руководитель Мягьямед Гьясратялиевди чан улхбаъ СикIухъ гъулан жямяаьтдиз, саб бицIи вахтнан арайиъ вари алархьну, кюмек дапIну гьаму майдан ккудубкIбаз, аьхю чухсагъул гъапнийи.
Му шадлугънан серенжемдиъ жара йишварианра хайлин хялар иштирак гъахьнийи, дурарикан сар – Мягьячгъала шагьриан дуфнайи Урусатдин гъулан жигьиларин региондин союздин председатель Рашид Аьбдуллаев вуйи. Дугъура СикIухъ гъулан жямяаьт спортдин майдан абццбахъди тебрик гъапIнийи.
Серенжемдиъ Табасаран райондин РССМ-дин учредитель Рустам Ибрагьимовдира иштирак’вал гъапIнийи.
Хъасин серенжемдин асас гьядиса – уьру лента гьадабтIувал гъабхьнийи. Думу гьюрматлу ляхин Табасаран райондин глава Мягьямед Къурбановди, СикIухъ гъулан агьали Несредин Мягьмудовди, РССМ-дин Дагъустандин региондин отделениейин председатель Рашид Аьбдуллаевди кIулиз адабгънийи.
Спортдин майдан ачмиш апIбахъди аьлакьалу вуди Гум’арин, Халгъарин ва Жулжгъарин гъуларин советарик кахьрайи гъуларин командйирин арайиъ волейболиан турнир кIули гъубхнийи. Талитар ихь ватанагьли, Урусатдин игит Рустам Мурадовдин ччвурнаккди кIули гъушнийи.
Волейболин турнириъ 8 команда иштирак гъахьнийи. Талитариъ сабпи йишв Гьесихъ гъулан командайи гъибиснийи, кьюбпи йишван сагьиб Бухьнагъ гъулан команда гъабхьнийи, хъа шубубпи йишв СикIухъ гъулан командайи гъазанмиш гъапIнийи. Турнириъ гъалибвалин йишвар гъадагъу командйириз райондин администрацияйин терефнаан кубокар, медалар ва грамотйир тувну.
Му серенжемдиъ Табасаран райондин имам Ансар Рамазановра иштирак гъахьнийи. Дугъу сикIхъарин жямяаьтдиз 15 агъзур манат, хъа волейболин талитариъ гъалиб гъахьи командйириз 10 агъзур манат пул тувну: сабпи йишв гъибису командайиз – 5 агъзур манат, кьюбпи йишв гъазанмиш гъапIу командайиз – 3 агъзур манат ва шубубпи йишван сагьиб гъабхьи командайиз – 2 агъзур манат.
Табасарандиъ айи РССМ-дин отделениейи 10 агъзур манат пулра, кубокарра, медаларра, грамотйирра, гьацира гъалиб гъахьу командйириз спортдин алабхьру палатра тувну.
Нубатнан цIийи майдан Хив райондин Ляхла гъулаъ тикмиш апIиди. Думу гъулра грантдин пландик кипна.
