1926-пи йисан Табасаран райондин ЧвулатI гъулан жямяаьтди, Рубас нирлан улдучIвувал ва Нериъ мягьлайиъ тумар урзру жиларин кьадар яркьу апIувал метлеб вуди, Жвул’арин уста ТIагьир жалб дапIну, гъяд дивнийи. Гъяд дивруган, тикилишчивалин ляхнарин жавабдарвал чаина гъулан агьали Аьбдулягьяд Имамовди гъадабгънийи.
Гьамусяаьт гъулаъ яшамиш шулайи яшлу касарин ва думу гъядун тикилишчивалин ляхнариъ иштирак гъахьи Демир Аьбдулязизовдин гафариинди, гъяд тикмиш апIруган, цементдин ерина муртайин лизиб ишлетмиш апIури гъахьну. Гъяд тикмиш апIбан бадали, икибаштIан, сакьюб мурта гьуркIудайи, гьаддиз гъулан агьалйири гъунши гъулариан ва гьадмугандин вари Кюре округдин лезги, агъул, дарги гъулариан муртйир уч апIури, дурар гьяйвнар ккитIну аьрабйириъди ЧвулатIна хури гъахьну.
Гьаци, варидари сатIиди ляхин апIбаз лигну, 1928-пи йисан гъядун тикилишчивалин ляхнар аьхирихъна гъафну. Гьаддихъан мина думу гъяд, Рубас нирин шид артухъ гъабхьиган, швнуб-саб ражари дурум тувну гьутIутIубччвди, гъира дийибгъну ими.
Цци гъулан агьали Мартин Сефербеговдин жягьтлувалиинди думу гъядран расвалин ляхнар гъахуз хъюгъну. Мартинди гъулан вари жигьиларин кюмекниинди ва Урусатдин жара регионариъ яшамиш шулайи чвултIарин агьалйирин дакьатариинди гъяд рас апIуз хъюгъну.
«Узу му месэла жямяаьтдин улихь гъитIибккиган, гъуландар вари рази гъахьнийи. Гъяд рас апIуз гъуландари гьарури чахьан тувуз шлу дакьатарииндира ва жарасира кюмек гъапIну. Му гъяд гъапIур йиз аьхю аба Аьбдулягьяд Имамов ву. Гьаддиз, йиз абайин жафа гьамци тарихдиан дудрубгри кIури ва гъулаъ уччвуб йишв ибшри кIури, му ляхнихъ хъюгъюр вуйза.
Магьа расвалин ляхнар вари аьхирихъна гъафну. Учу, гъяд’инси, дидин багарихьнара аквар гъизигунча. Цал дапIну ккуни йишварихь цалар дапIну, дурар гъарсунча.
Гьацира гъядун гъирагъдихъди гъягъюрайи мягьражарра рас дапIну, дураризра шир гъивну. Мидланра гъайри, гъядлан гъябгъюрайи газран турбара жара йишвахьинди гъубхунча ва гъядлан тина зарбди машинар хътраъбан бадали, рякъ’ин гъузгъун алапIну.
2028-пи йисан му гъяд тикмиш гъапIхъан мина 100 йис хьибди. Думу гьядиса заан дережайиъди къайд апIуз планламиш дапIнача», – гъапнийи Мартин Сефербеговди.
Аьхириъ дугъу гъулан гъяд цIийи алапIбаъ пулиинди, чпин хилариинди кюмек гъапIу касариз, вари гъуландариз, жигьилариз чан терефнаан газатдин машариан тина чухсагъул мялум гъапIнийи ва гьамцдар гъуландар айивалиинди чав дамагъ апIурайиваликан гъапнийи.
