КIури шулу: «Инсан зегьметну адлу апIуру». Гьаци хьузра ву. Фунуб кеспнан эйси гъахьишра, чан пишейихъ юкIв хъади, думу намуслувалиинди кIулиз адабгъру кас гележег хъайир вуди гьисаб апIура. Намуслу ва тажрубалу зегьметкешар ихь арайиъ хайлин а. Гьадрарикан сар Табасаран райондин Цалак гъулаъ фельдшерди лихурайи Айнаханум Рашидовара ву.
Айнаханум Мирзааьгьмедовна 1962-пи йисан 29-пи апрелиъ Табасаран райондин АхьитI гъулаъ бабкан гъахьну.
БицIидихъан мина Айнаханумдиз, инсанариз чакан тина кюмек апIуз шлу пише ктабгъуз ккун гъабхьнийи. Аргъаж шули, гъулан мектебдиъ гьуркIну заан образование айи мялимар, багъри гъулаъ аьзарлу гъахьи инсандиз кюмек апIуз духтрар ва жара пишекрар адрувалин думу ужуди гъавриъ айи.
БицIидихъан мина духтирвалихъ юкIв хъайи Айнаханум, 1978-пи йисан АхьтIарин кьялан мектебдиъ 9-пи класс ккудубкIбалан кьяляхъ, Каспийск шагьрин медучилищейик фельдшервалин курсариъ урхуз кучIвнийи. Къайд гъапIу училище 1982-пи йисан ужудар аьгъювалариинди ккудубкIну, думу багъри гъулаз гъафнийи.
Зегьметнан рякъ Айнаханум Рашидовайи 1982-пи йисан Табасаран райондин аьзарханайин бицIидарин отделениейиъ медицинайин аьхюнур сестради лихбалан ккебгъру. Му ляхниъ жикъи вахтнан арайиъ гъилихнушра, дугъу агьалйирин терефнаан аьхю гьюрмат гъазанмиш гъапIнийи. Гьацира душваъ Айнаханум Рашидова комсомолин секретардира лихури гъахьну.
1986-пи йисан Цалак гъулаъ фельдшервалин пункт абццхъан мина гъийин йи-гъазкьан Айнаханум Рашидова душваъ заведующийди лихура. Чав гъилиху вахтна гъизигу лайикьлу зегьметназ лигну, дугъаз хайлин пешкешарра тувна: Табасаран райондин 70 йис хьпаз тялукь вуди республикайин сагъламвал уьбхбан министрихьан гьюрматнан грамота, гьацира Табасаран райондин главайихьан гьюрматнан грамотйир ва хилихъ хъибтIру сяаьт ва гьацдар жарадар.
Ццийин йисан 28-пи сентябриъ Табасаран райондин 90 йис хьпаз тялукь вуйи серенжемдиъ Айнаханум Мирзааьгьмедовнайиз «Дагъустан Республикайин сагъламвал уьбхбан лайикьлу гъуллугъчи» кIуру гьюрматнан ччвур тувну.
Айнаханум Мирзааьгьме-довна лайикьлу ччвур тувбахъди тебрик апIури, дугъаз ляхниъ хъана заан хъуркьувалар ккун апIурхьа.
