Гьаму йигьари Хив райондин кьялан музейин гъуллугъчйир, кIулиъ музейин директор Тамила Жабраилова ади, Хив райондин Мажвгул ва Ляхла гъуларин мектебариъ айи музеяриз хялар гъахьнийи.

Музеяриъ айи экспонатарикан, дурарин тарихнакан Ляхлаарин мектебдин тарихнан дарсар киврайи мялим Керим Маллаевди кьатI’иди чан улхбаъ гъапнийи.

Мидланра савайи, райондин музеяр ктарди, Тамила Жабраилова чан коллективдин вакилар ва Хиварин кьялан мектебдиъ урхурайидарра хъади СтIал Сулейман райондин кьялан музейиз, шаир СтIал Сулеймандин ччвурнахъ хъайи музейиз ва Гьясан-Эфенди Алкьадарийин музейизра хялар гъахьнийи.

Гъунши райондин музеяриз гъягъювалин себебарикан ктибтуб ккун апIури, узу Тамила Аьлиевнайихьна илтIикIнийза.

«Учу музеяриз хялижв хьпан асас метлеб гьадму вуйики, ич музейиъ адруб зиихъ улупнайи музеяриъ фу аш ахтармиш апIувал, ич ади, дурарин адруб фу-вуш аьгъю апIувал, дурарин коллективарихъди таниш хьувал, гъабхурайи ляхнихъди аьлакьалуди цIийи аьгъювалар гъадагъувал, айи аьгъювалар сакIал ва дюз алаувал. Яна, саб гафниинди, коллективарин арайиъ, ихь миллетарин арайиъ дуствалин йикьрар йитIувал вуйи.

Гъи, гьяйифки, гьамусдин наслин гизаф вакилариз му музеяриъ айи сасдар экспонатарин ччвураркьан мялум дар. Ич коллективди ва ихь культурайин хулариъ лихурайи гъуллугъчйири абйирихьан ухьухьна дурубкьнайи ихь халкьдин тарих арайиан дудрубгуз хайлин зегьмет зигура. Эгер зиихъ улупнайи ихь райондин мектебариъси, миди вуйи мектебариъ вушра, ясана культурайин хулариъкьан мицдар экспонатар уч дапIну, музейиз йишв улупнийиш, гизаф ужу хьибдийи. КьатI’иди гъадагъу аьгъюваларин аьгьвалатнакан яркьуди ва маракьлуди гъябгъюрайи йисан декабрин вазлиъ докладдиъ ва гьякь-гьисаб тувбаъ ктибтидихьа. Улихь хъана музеяриз гъягъбан рякъяр хьайич. Багарихьди Кьурагь ва Ахцигь районаризра гъягъидича»,

– ктибтнийи йиз сюгьбатчийи.

Багъри юрд, дидин культура ва тарих ахтармиш апIбаъ уву ва яв коллективди зигурайи чарйириз аферин, Тамила Аьлиевна. Баркаллу ляхниъ хъана хъуркьувалар ва ягъурлу рякъяр ишричвуз!