Гьаму йисан октябрин ваз ктабхъайиз, Дагъустан Республикайин ярквран мяишатдин Комитетди 20 гектар жилиин 22 агъзуртIан артухъ гьарар кивувал планламиш дапIна. Дидин гьякьнаан ич редакцияйиз министерствойин мялуматарин гъуллугънаан хабар тувну.

Яркврар ухьуз марцци гьава тувру, чиркин гьава марцц апIру кюмекчйир ву. Республикайиъ гъулариз газар гъизигхъан тина яркврарин кьадар артухъ шула.
Гьарар кивбан ляхнар «Яркур уьбхюрхьа», «Яркур, яшамиш йибхь!» акцйирин дахилнаъди кIули гъягъиди. Гъийин йигъаз 9 гектар жилиин 12 агъзур гъелем кивна, 50 гектар ярквран аьтрафариъ марцц апIбан ляхнар кIули духна.

Му акцйирин дахилнаъди республикайин ярквран мяишатди ярквран 100 гектар аьтрафар зирзибилихьан марцц апIувал планламиш дапIна. Гьацира агьалйирин арайиъ экологияйин культура за апIбан меселайиъра аьхю ляхин гъабхбанди ву.