Октябрин 25-пи йигъан Мягьячгъалайиъ Аь.Тахо-Годийин ччвурнахъ хъайи Дагъустандин илми ахтармиш апIру педагогикайин институтдин багъри литературайин секторин 40 йис тамам хьпаз бахш дапIнайи «Филологияйин илим ва мектеб: сюгьбат ва аьлакьйир» ччвур тувнайи конференция кIули гъубшнийи.
Серенжемдиъ Азербайжандиан, Грузияйиан, Москвайиан, Ставрополиан ва Урусатдин жара регионариан аьлимар, Дагъустандин вари районариан бабан чIал кивру мялимар иштирак гъахьнийи.
Конференция ачмиш гъапIу, Аь.Тахо-Годийин ччвурнахъ хъайи Дагъустандин НИИ-йин директорин вазифйир тамам апIурайи Марьям Гьясановайи институтдиъ бабан чIалнан литературайин сектор 1979-пи йисан филологияйин илмарин доктор Къурбан Акимовдин тешкиллувалиинди ачмиш гъапIуваликан ва секторин ляхин бинайиан гъабхуз хъюгъбакан жикъиди ктибтнийи.
Серенжемдиъ докладар хьади удучIвну гъулху илимдин гъуллугъчйири гъийин деврин литературайин, фольклорин, образованиейин идарйириъ бабан чIал ва литература кивбан теорияйин ва методикайин месэлйир гъитIирккнийи.
Чан докладдиъ ДНИИП-дин бабан чIалнан литературайин секторин илимдинна ахтармишарин ляхникан секторин заведующий, филологияйин илмарин кандидат Низами Сафарялиевди ктибтнийи.
Дугъу къайд гъапIганси, секторин вазифа – бабан чIал ва дагъустан литература кивбиин гюзчивал гъабхувал ву. Институтдин илимдин гъуллугъчйири, бабан чIалнан ва литературайин дарсар киврайи мялимарин тажруба ахтармиш апIури, 5-11-пи классариъ бабан чIалнан литература кивбан урхбан программйир, методикайин, урхбан пособйир ва гьацдар жара китабар яратмиш апIбан зиин зегьмет зигура. Доклад урхурайири, аьхиримжи йисари мектебариъ бабан чIалнанна литературайин дарсар кам апIбахъди аьлакьалу вуди, мектебариъ лихурайи мялимариз читинвалар алахьурайиваликан, институтдин гъуллугъчйири гьязур дапIнайи урхбан пособйир чапдиан адагъуз даршулайиваликанра ктибтнийи. «Вари жюрейин мумкинвалар ишлетмиш дапIну, ухьу ихь бицIидариз бабан чIал аьгъю апIуз айи ихтиярар уьмриъ кечирмиш дапIну ккунду», – къайд гъапIнийи Низами Сафарялиевди чан улхбан аьхириъ.
