Гъябгъюрайи йисан февраль вазлиъ «Петербург ва Петербургдин агьалйир» программайин дахилнаъди Санкт-Петербург шагьрин гьюкмин тамам апIру органари шагьрин социалин политикайин Комитетдихъди, гьюкуматдин идарйирихъди ва жямяаьтлугъ тешкилатарихъди сатIиди «2019-пи йисандин варитIан ужур жилижви» конкурсдин натижйир гъивну.
Думу конкурсдин 11 номинация-йиъ жюрбежюр заан гъуллугъариъ лихурайи агъзуртIан артухъ гьякимар, политикар, дилаварчи касар ва аьдати ватандашар иштирак гъахьну. Дурарин арайиъ айи ихь ватанагьли Фирудин Агъарягьимов «Шагьрин мяишат» номинацияйиъ варитIан заан йишваз лайикьлу гъахьну.
Санкт-Петербург шагьрин метройин швнуб-саб станцйириъ, шагьрин асас кючйириъ му касдин сурат кайи аьхю шиклар рякъруган, узуз думу табасаран халкьдин вакил вуйиваликан хабар адайзуз. ЦIиб вахтналан узу зиихъ къайд дапIнайи комитетдиз табасаран ватандашарикан мялуматар гъадагъуз илтIикIган ва думу касдихъди гюрюшмиш гъахьиган, шад ва дамагълу гъахьнийза.
Фирудин Агъарягьимов Санкт-Петербург шагьрин гьюкуматдин «Курортдин ярквран парк» тешкилатдин директорди лихура.
Думу Табасаран райондин АхьитI гъул’ан ву. Дугъан адаш, Мевлют халу, Табасаран райондин швнуб-саб гъулаъ бицIидариз дарсар киври, мялимди гъилихнийи. Фирудинди 8-пи классдиъ урхурайиган, дугъан абйир-бабар Дербентдиз кючмиш гъахьнийи. Дупну ккундуки, дурарин саки вари аьхю тухум Дербентдиъ яшамиш шулайи. Хъа аьхю аба, тухмин кIулиъ айи Нажмудин халу, Дербентдиз кючмиш гъахьи табасаранарикан сарпир вуйи.
8-пи класс кудубкIбан кьяляхъ, Фирудин Санкт-Петербург шагьриъ (гьадмугандин Ленинграддиъ) сифте техникумдик, хъасин Ленинграддин ариш-веришдин институтдик урхуз кучIвнийи. Урхбахьан азад вахтна думу спортдиинра машгъул вуйи. 18 йисан яшнаъ айиган, думу юкьяр дисбаан «Урусатдин спортдин мастер» ччвурназ лайикьлу гъахьнийи.
«Курортдин ярквран парк» тешкилатдин директорди тяйин апIайиз, Фирудин Мевлютович швнуб-саб жара гъуллугъариъра гъилихну.
«Йиз гьаму ляхнин асас вазифа – шагьриз дахил шулайи яркврариъ ва паркариъ марццишин тямин апIувал, инсанари думу йишвариъ рягьятвал гъадабгъбан бадали, гъулайвалар яратмиш апIувал ву. Узуз му ляхин кIваантIан кьабулди вузуз. Фицики, узу директорди тяйин апIайиз вуйи яркврарин ва паркарин аьгьвалат гъи рябкъюри дигиш гъабхьну. Узу къайда ужуб терефназди дигиш апIуз, агьал-йири аьшкьниинди рягьятвал гъадабгъуз, паркдин мублагъ аьтрафар арайиз хуз вари рякъяр агураза.
Гъи ич комитетдин сатIи вуйи ляхниъ ужуб натижа арайиз дуфна. Саб гафниинди, Санкт-Петербург шагьриъ гъулай аьгьвалат яратмиш апIурайидар учу вуча», – гъапнийи Фирудин Мевлютовичди.
Фирудин Агъарягьимовдин «Курортдин ярквран парк» тешкилатдин директорди лихури гьеле 5 йистIан даршра, дугъу, дугъриданра, хайлин ляхин дубхна.
Гьаму улихьнаси кIули гъубшу конкурсдиъра жюрбежюр идарйирин улихь-кIулихь хьайидариз, чпин гъуллугънаъ аьхиримжи 10 йисан гъапIу ляхниз дилигну, кьимат туври гъахьнийи. Фирудин Мевлютовичди иштирак’вал гъапIу номинацияйиъ 120-тIан артухъ вакиларин арайиъ дугъан ляхниз, зегьметназ, шагьур артмиш апIбак киврайи лайикьлу пайназ жюрийи варитIан заан кьимат тувнийи.
Жилижвуван тярифар гафариинди ваъ, хъа тамам дапIнайи ляхнар улупбиинди дапIну ккунду. Ужудар, баркаллу ляхнарин натижа рябкъруган, тярифнан гафарра арайиз гъюру.
«Узуз йиз Ватан, багъри Табасаран, мублагъди артмиш дубхьну ккундузуз. Душваъ ужудар рякъяр, деврин тIалабариз жаваб тувру больницйир, мектебар, клубар ади ккундийзуз. Улихьди, учу бицIи баяр вуйи йисари, Табасарандиъ жвугърийирин аьхю багълар айи. Гьамусра багълар кивуз манигъ’вал рябкъюрадарзуз. Йиз халкьдиз сагъ’вал, мублагъ’вал ккун апIураза», – гъапнийи ич гюрюшдиъ Фирудин Мевлютовичди.
Санкт-Петербургдиъ дагъустандин диаспорайи гъахру гьарсаб серенжемдиъ Фирудин Агъарягьимов гьюрматлу хялижв ву. Думу Санкт-Петербург шагьрин спортдин юкьяр дисбан жюрйирин Федерацияйин президентдира кадагъна. Шагьрин губернаторин, правительствойин терефнаан дугъаз хайлин гьюрматнан грамотйир ва дипломар тувна.
Фирудин Агъарягьимовдиз кьюр риш ва сар бай а. Шубар эвленмиш духьна, бай Арсенди Санкт-Петербургдиъ гьюкуматдин ярквранна техникайин Академияйиъ урхура. Чан адашси, Арсенра спортдиин юкIв алир ву. Думу юкьяр дисбаан Санкт-Петербургдин чемпион гъахьну ва гьамусяаьт Урусатдин талитарихьна гьязур шула. Агъарягьимоварин хизандиз багъри ватандиан саламар хътаури, хъана заан хъуркьуваларин сагьибар хьуб ккун апIурхьа.
