Улихьна йигъари Дербент шагьриъ КПРФ партияйин Дагъустан Республикайин Халкьдин Собраниейин депутат Къурбан Гьябибовдин кюмекчи Пиряли Пирялиевдихъди ич мухбир Умгьанат Сулейманова гюрюшмиш гъахьну ва партияйин гъайгъушнарикан, коммунистари жигьил наслихъди гъабхурайи ляхникан сюгьбат гъубхну.

– Пиряли Багьудинович, коммунист партияйи гъийин уьмриъ уйнамиш апIурайи роликан фу пуз шулу?

– Гьамусяаьт Дагъустан Республикайиъ КПРФ-дин терефнаан миржир кас Халкьдин Собраниейин депутатар ву. Кьюр депутатди Дербент шагьриь ляхин апIура. Коммунист партия дикъатлуди ихь фягьла ва нежбер инсанарин тереф уьбхюрайиб, зегьметкеш инсанарин гъайгъушнаъ айиб вуйи. В.И.Ленинди «Коммунист партия – ихь деврин фикир, эдеб ва намус ву», гъапнийи. Ав, гьадгъу гъапиганси, коммунистар нумуна вуди, гьарган жанлуди ляхин апIурайи инсанар вуйи. Гъира коммунистари гьаци ляхин кIулиз адабгъуз чалишмиш`валар зигура.

Шагьрин агьалйир чпин читин месэлйир, гьял апIуз даршулайиб хьади кми-кмиди учухьна илтIикIуру. Учу, дурариз кюмек апIбан бадали, уч`ан удукьруб вари апIури шулча. Му ляхин апIури, ккудушу хайлин йисари аьхю кьадар агьалйириз кюмекчйирра гъахьунча.

– Гъушу насларин вахтариъ коммунистар фужар вуш ва дурари фициб ляхин апIураш, варидариз аьгъяйи. Гъийин баяр-шубариз коммунистар фужар вушра аьгъдар. Ичв партияйи жигьиларихъди фициб ляхин апIура?

– Аьхиримжи йисари ихь жигьил насларин ва, уьмумиди лигуруш, имбу вари агьалйиринра чпин ва жара халкьарин тарихдихьна, Ватандихьна вуйи маракьлувал жанлу шула. Улихьнаси Дербентдиъ 7-пи ноябрин машквар къайд апIуз, коммунист партияйин иштаракчйир ктарди, хайлин студентарра гъафнийи, серенжемдиъ жара агьалйирира иштирак`вал гъапIнийи.

Гъи учу апIурайи ляхнихъди ихь студентарра таниш апIуз чалишмиш шулача. Ич гъийин асас метлебарикан саб гьадму ву. Совет гьюкуматдин вахтна коммунист партияйи мектебариъ, колледжариъ, вузариъ урхурайидариз аьгъювалар, тербия тувувал, дурар зегьмет зигувалихьна гьязур апIувал асас йишв`ин дебккну гъахьну. Гъи учура думу ляхниз аьхю эгьемият туврача. Инсан, чаз аьгъювалар ади хьувалилан гъайри, сифтена-сифте чаз хас вуйи эдебнан къайдйир ва маракьар айир, зегьметнан заан культура хъайир, ватандашси ва жанлу тикилишчиси тербияламиш дапIнайир духьну ккунду.

Коммунистари гъабхурайи гьаму мяракайиъ ихь студентар иштирак хьувалиъ дерин мяна а. Гьаз гъапиш, жигьил наслар уьмриз дюзди лигури, харжи рякъюъ адрахъруганси тербияламиш апIувал – ич асас вазифа ву. Дурар аьгъюваларихьна маракьлувал ади, зегьметниин юкIв алди, Ватандихьна ва чан ччиварихьна ккунивал ади тербияламиш апIувал – аьхю мянайин ляхин ву. Чан вахтари В.И.Ленинди ухьуз гъапиганси ва улупиганси, «уьмриъ гьяятдиз кечирмиш шулайиб, урхурайи йишвариъ улупурайибдилан ккебгъра». Аьхю шулайи наслиз аьгъювалар, тербия тувувал чарасуз вуди уьмрихъди ижмиди аьла-кьалу дубхьну ккунду. Гьарсар урхурайириз учв яшамиш шулайи вилаятдин тарих аьгъяди ва гележег ужуб апIуз чалишмиш`вал ади ккунду.