Гьаму улихьна йигъари ич хусуси мухбир Ражаб Нуров Табасаран райондин РЭС-дин начальник Багьудин ТIагьировдихъди гюрюшмиш гъахьну ва къайд дапIнайи идарайи, чвлинна кьюрдун аьхъю вахтнахьна гьязур хьпан бадали, кIули гъахурайи гьязурлугъ’валин ляхнарикан сюгьбат гъубхну. Думу жикъиди исихъ туврача.
– Багьудин Тажудинович, Табасаран РЭС чвлинна кьюрдун фасларихьна фици гьязур дубхьна?
– Табасаран РЭС-дин дахилнаъ йирхьуб подстанция (ПС) – Хючнаъ, ЦIанак, Ярсаъ, Сиртич, Хив, Сардаркентдиъ; 10 кВ-дин 529,56 километр, 0,4 кВ-дин балансдиз гъадагънайи 344,72 километр ва 0,4 кВ-дин 127,54 километр балансдиз гъадагъну адру электролинйир ва жарадар а. Кьюрдухьна гьязурлугъар гъахури, Табасаран РЭС-ди 2019-пи йисан Табасаран ва Хив районарин жилариин али вари объектарин ляхин ахтармиш гъапIну.
Табасаран РЭС-ди агьал-йир акварихъди тямин апIбаъ гъубху ляхнин натижйир ужудар ву пуз шулу, фицики 2018-пи йисахь лигну, цци аварйирин кьадар 1,4%-дин цIиб гъабхьну. Инсанар аквар адарди гъитбан дюшюшарин кьадарра 8,6%-дихьнакьан цIиб гъабхьну. 2019-пи йисан 10 вазлиз улупнайи план тамам дапIнача.
– Хъа ктабхъурайи йисан расвалин фицдар ляхнар (бурузар гьюдюхбан, элект-рикдин цIийи симар зигбан, трансформаторар дивбан) кIули духначва?
– Ццийин йисан кIули духнайи расвалин ляхнарикан улхуруш, дурар гьамцдар ву: Халагъ, Гурхун, Гъвандикк 04 кВ айи 8,2 километр гьавайиъди дизигнайи линия (ВЛ), 10 кВ-дин 28,4 километр ВЛ («Хучни» ПС-дин 6-пи нумрайин фидер), 111 буруз, 37 рукьанна бетондин приставк-йир, 268 изоляторар гьюдюхну ва жара ляхнар тамам гъапIну.
2019-пи йисан 1-пи нояб-риз дибдиан расвалин ляхнар апIуз кайи 0,4 кВ-дин ВЛ рас дапIну ккудубкIну. Электросетарин 80% объектар ахтармиш гъапIну, 7,1 гектариъ айи гьавайиъди вуйи ЛЭП-дин трасса марцц дапIна, 48,6 километр симар гъизигну.
– Гележегдиз фицдар планар айичв?
– Гьаму дапIнайи ляхнариз лигну, техника жигьатнаан гъуллугъ апIбан гьялнаан адабхънайи оборудование ва ВЛ, аварйир цIиб хьпан ва электросетарин мяишатдин ляхин ужу апIбан бадали, районариъ ишлетмиш апIувал дюз гъюрадар. Ихь республикайиъ электросетарин ляхин къайдайиз хпан бадали, 6 йисандин арайиъ Дагъустандиъ айи вари электросетар сатIиди рас апIуз къарар адабгъна. Гьадму программайиинди 2019-пи йисан Табасаран райондиъ айи РЭС-дин 10 кВ-дин ВЛ («Хив» ПС-дин 4-пи нумрайин фидер), «Сиртич», «ЦIанак» подстанцйирин 1-пи ва 6-пи нумрайин фидерар, «Ярса» ПС-дин 3-пи нумрайин фидерар рас апIуз пландик кирчна, мидланра гъайри, 218,7 километр манзилнаъ комплектдин трансформаторин подстанцйир (КТП) гьюдюхюз, 5 гужли трансформатор дивуз, 5 КТП капитально рас апIуз кка.
– Чухсагъул, Багьудин Тажудинович. Ляхниъ хъуркьувалар ишри.
Аьхиримжи вахтна Хючна гъулаъ, агьалйириз вахт ккимиди мялум дарапIди, аквар ктIушвбан дюшюшар гизаф шула кIури, халкьдин гизаф наразивалар а. Багарихьди райондин электросетарин гъурулушдин гъуллугъчйири думу месэлара гьял апIур кIури, умуд кивдихьа.
