Табасаран райондин ГьепIил гъулан администрацияйин дахилнаъ ГьепIил ва ТIаттил гъулар а. Думу гъулариъ 2500-дихьна инсанар яшамиш шула. СП-йин кевшенар 1295 гектар жилиин гьатIарццна, поселениейин айитI айи рякъярин манзил 30 километр ву. Гьелбетда, аьхю поселениейиъ гьял дапIну ккуни месэлйирра, гъайгъушнарра гизаф шулу. Улихьнаси «ГьепIил гъулан совет» СП-йин кIулиъ айи Авсет Аьбдуллаевди ич мухбир Ражаб Нуровдиз чав регьбервал туврайи гъулан поселениейин гъайгъушнарикан, гъахурайи ляхнарикан ктибтнийи. Дурарин сюгьбат жикъиди исихъ чап апIурача.
– Авсет Велиюллаевич, «ГьепIил гъулан совет» СП-йин аьтрафариин фицдар социалин идарйир ал?
– «ГьепIил гъулан совет» СП-йин аьтрафариин кьюб мектеб ерлешмиш духьна – ГьепIларин ва ТIаттларин, кьюб бицIидарин багъ, саб культурайин хал, дидланра савайи, кьялан ва бицIи бизнес-карханйир.
Поселениейиъ кIули гъягъюрайи вари уж’валнан ляхнар гизафси Табасаран райондин администрацияйинна ГьепIил гъулан администрацияйин сатIиваликан, депутатарикан ва гъуларин мистарин имамарикан асиллу ву.
– Ляхниъ фицдар цIийи къайдйир ишлетмиш апIу-рачва ва фицдар проектариъ иштирак шулачва?
– Ццийин 2019-пи йисан «ГьепIил гъулан совет» СП «Шагьрин гъулай шартIар дюзмиш апIувал» ва «Жямяаьтлугъ йишвар ккабалгувал» кIуру программйириъ иштирак гъабхьну. Гьадму программйириинди ГьепIил гъулан мектебдин гьяятдиъ спортдин бицIи майдан тикмиш апIуз хъюгъна. Дидин меценат Москва шагьриъ яшамиш шулайи ГьепIил гъулан агьали Аким Сеферов ву. Му проектдин уьмуми кьимат 2 280 000 манат ву. 350 000 манат меценатди тувну, 180 000 манат ГьепIил гъулан советдин бюджетдиан, хъа 1 750 000 манат Дагъустан Республикайин бюджетдиан жара гъапIну.
ГьепIил гъулаъ ФАП-дин идара тикмиш апIувалра аьхирихъна гъюра, думу Дагъустандин сагъламвал уьбх-бан Министерствойин проектдиинди тикмиш апIурайиб ву. Дагъустандин сагъламвал уьбхбан министр Жамалудин Аьлиевичдиз, Табасаран райондин глава Мягьямед Сиражудиновичдиз, Табаса-ран райондин ЦРБ-йин кIулин духтир Абсередин Исмяиловичдиз гьаму программйир кIулиз адагъуз кюмек тувбаз чухсагъул мялум апIуз ккундучуз.
Накьварихъ йишвар къайдайиз хуз 2019-пи йисан «ГьепIил гъулан совет» СП-йин бюджетдиан 60 000 манат пул тувну: 30 000 манат ГьепIил гъулан жямяаьтдиз накьвар ерлешмиш духьнайи 3 гектарилан рукьан бару илтIибкIуз, 30 000 манат – ТIаттил гъулан цIийи накьварихъ йишв къайдайиз хуз.
Ццийин йисан ГьепIил гъулан администрацияйи гъуларин айитI ерлешмиш духьнайи рякъяриз асас фикир тувра. Кючйиригъ аквар зигбиин саб хайлин ляхин дапIна, бурузарик акв цIибтIан дурубгру аквнанна диоддин лампйир китIна. Зирзибилиз майднар гьязур дапIну, контейнерарра дивна. Гьадму ляхнариз СП-йин бюджетдиан 55 000 манат пул деебтну. Гъулан айитI марццишин уьбхбан бадали, саб хайлин ляхин гъабхурача, СП-йин жилариин али, зирзибил дабхьуз улупну адру йи-швар хъяркьюнча.
ТIаттил гъулан кьялан кючейиъ айи штун булагъ дибдиан рас гъапIунча, гьадму ляхнариз СП-йин бюджетдиан 45 000 манат пул деебтну.
– Ляхниъ фицдар читинвалар алахьури шулчвуз?
– Алахьру читинвалар техника адрувалихъди аьлакьалу ву: миннат дапIну, думу жара йишвариан дубхну ккунду. Гъулан жямяаьтдихъди ляхин апIуз вахт гьубкIудар, хъа кабинетдиъ апIурайи ляхин варидариз рябкъюрдар. Амма сабдизра дилигди арайиз гъафи месэлйир гьял апIуз, халкьдиз кюмек апIуз чалишмиш шулача. Администрацияйин ляхин – сабпи нубатнаъ инсанарин гъуллугънаъ хьувал ву. Варидариз ужуб, уччвуб, марцци гъулаъ яшамиш хьуз ккунду, гьаддин гьякьнаан гъулан глава депутатарин, гьацира жямяаьтдин кюмекназ ккилигура.
Налогар вахтниинди уч апIуз чалишмиш шулача. ФИАС-дин программайиинди кючйириин ччвурар иливну, хуларик нумрар китIну ккудубкIунча. ТIаттил гъулан кючейиъ гьарар кивнайи зул яратмиш апIузра гьязур шулача.
– Чухсагъул, Авсет Велиюллаевич, ичв ккергънайи ляхнар вахтниинди ккудукIуз мумкинвалар ишричвуз.
