Силис гъабхру органарин вакилари Дагъустандиъ Урусатдин ФСИН-дин региондиъ айи управлениейин шубуб идарайин кIулиъ айидар гъидисну. Дидин гьякьнаан ТАСС-ди мялумат тувра.
«Улихьмиди вуйи улупбариинди, дидиснайидар 7-пи нумрайин колонияйин начальник Рабадан Аьлибулатов, 4-пи нумрайин дустагъдиъ сагъламвал за апIбан идарайин начальник Аьлигьяжи Мягьямедов, Мягьячгъалайиъ айи 1-пи нумрайин СИЗО-йин начальник Дауд Давудов ва хъана шубурсан УФСИН-дин гъуллугъчйир ву», – дупна мялуматдиъ. Дурарик руш’ват бисувалин ва лутивалин тахсрар кирчра.
Къанун уьбхру органарин вакилин гафариинди, му касарин гьякьнаан силисар гъахбан ляхин Ростовдин областдиъ айи ФСИН-дин КIулин управлениейин начальник Муслим Даххаев дидиснайивалихъди аьлакьалу ву.
Муслим Даххаев ва дугъан заместителар хусуси метлеб айи гъуллугъарин вакилари ноябрин 13-пи йигъан гъидисну. Дидиснайирик коррупцияйин ва гьюкуматдин жини ляхнарикан мялуматар тарагъувалин тахсрар кирчна. Гьадму йигъан думу кьюб вазлизди гъидисну.
Муслим Даххаевди 2005-2017-пи йисари Урусатдин Дагъустандиъ айи УФСИН-дин кIулиъ ляхин апIури гъахьну. Генерал-майор М.Даххаев «Жилирвалин ордендин» ва ччвурнахъ тувру тапанчийин сагьиб ву.
