21-пи ноябриъ Москвайин Кремлиъ гьюкуматдин пешкешар тувбан аьдатнан серенжем кIули гъубшну. Урусатдин Президент Владимир Путинди саб жерге ватанагьлийириз, культурайин, образованиейин, медицинайин, спортдин, гьясил апIбан цирклариъ гъазанмиш дапIнайи хъуркьувалариз лигну, орденар ва медалар тувну.
«Ичв гьаму вахтнан хайрар ишри, гирами ярашугъар ва дустар! Гъи Кремлиъ ихь машгьур ватанагьлийир, ихь машгьур ватандашар уч духьна. Дурарин зегьмет, яратмиш апIбар, кьисмат сарун ихь уьлкейин тарихдихьан жара апIуз даршлу пай дубхьна, хъа дурарин гъалибвалар ва текрар апIуз даршлу заан хъуркьувалар – Урусатдин ва ихь халкьдин дамагъ ву», – ккебгънийи чан улхуб Владимир Путинди.
Лишанлу гъапIдарин арайиъ Дагъустан Респуб-ликайин Госсоветдин Гьюр-матлу Председатель Мягьямедов Мягьямедяли Мягья-медовичра айи. Уьлкейин кIулиъ айирин гафариинди, Мягьямедяли Мягьямедовди Ватандиз лап читин ва къурхулу вахтари ихь уьлкейин улихь дийигънайи варитIан читин месэлйир гьял апIбаъ аьхю иштирак’вал улупну. Дугъу чан уьмрин тажруба, ватандашвалин буржийиз вафалувал, рюгьнан кьувват ва гъазанмиш дапIнайи ад гъира гьюкуматдин асулар мюгькам апIбаз сарф апIура.
Мягьямедяли Мягьямедов-диз, уьлкейин ва халкьдин улихь гъазанмиш гъапIу хусуси зегьметнан гьунарариз лигну, Урусатдин Федерацияйин Зегьметнан Игит кIуру ччвур ва хусуси тафавутвалин лишан – «Урусатдин Федерацияйин Зегьметнан Игит» гъизилин медаль тувну.
