Мейлан Нежефов
Украинайиъ кIули гъягъюрайи женгариъ талаф гъахьидарин гъамлу сиягьнак хайлин ихь ватанагьлийирин ччвурарра ка. Гьадрарикан сар – вахтсузди уьмриан гъушу Тимур Астарханов ву.
Тимур Зейнудинович Астарханов 1991-пи йисан 24-пи февралиъ Хив райондин Зилдикк гъулаъ Зейнудин ва Гъизил Астархановарин хизандиъ бабкан гъахьну. Адашдина дадайи, чпин адру-дарувализ дилигди, уларин сабпи аквнан цIюмгълиз ккимбуб ккимиди зат гъитундайи. Тимурин байвахтнан йисар варидарин кIваан гъябгъру хиялси, хъайи-хъайибси тIурниин алаънайи гьибарси гъушнийи. Гьаци, 2006-пи йисан, сабкьан шубуб ктарди багъри гъулан 9-пи классдин мектеб ккудубкIну, хъасин, 2008-пи йисан, гъунши Мажвгларин кьялан мектебдиъ 11-пи класс ужудар аьгъювалариинди ккудубкIуру. Гьадму йисан ДГУ-йин Ригъ гьудубчIвру терефнан чIалар аьгъю апIру факультетдик кучIвру. Саб улхуб-рахубра адарди, ужудар аьгъювалар гъадагъну, имтигьнар заан кьиматариз туври, дугъу 2013-пи йисан урхуб ккудубкIуру. Амма, ухьуз мялум вуйиганси, Дагъустандиъ ляхниъ дийигъруган, улихь-кIулихь хьайидарин «убрушвар» аьхюди ву, гьаддиз Тимуриз сад йигъанра чан пишекарвалин рякъюъди ляхин апIуб кьисмат гъабхьундар.
Саризра кIару аьбаси тувдарза дупну, дугъу, 2015-пи йисан аьхириъ контрактдикк къул дизигну, Урусатдин яракьлу кьувватарин жергйириъ гъуллугъ апIуз хъюгъру. Гьадму йигъланмина башламиш дапIну, чав туву дявдин аьгьт баркаллуди кIулиз адабгъури, Тимур Астарханов сифте Сирияйиъ, хъасин Украинайиъ гъахурайи дявдин цIин майднариъ гъахьну. Сач дугъу гъунши уьлкейин сяргьятариин чан жигьил жан фида гъапIну.
«Я бахт, я вахт бегьем дархьиди уьмриан гъушу бейнава. Йиз аьхиримжи йигъазкьан ипIру уьлихъдира, алабхьру палатдихъдира узуз гъафун гъапIваки, дадайин. Вушра сабди кIваз сабур ва архаинвал туврайиз. Жарарин кьяляхъ дулулхди, дугъанубдиз тямягь дарапIди ва дустагъдин ниъ хътарди, хъа анжагъ Ватан уьбхру кьягьяларин рякъюъди, игитарин дестейиъди уьмриан душну, багъри гъулаъ накьваригъ яв накь хьуб ва райондин администрацияйин цалик мармардашдин гъван кебхну аргъаж шулайи наслариз уву нумуна хьували. Йиз му гафнан мянайин анжагъ дердну кабаб гъапIдартIан гъавриъ даршул. Хъа миди вуйидариз жвуван веледдин дерд нивкIукдикьан дярябкъричвуз! Кьадарсуз учIвруб ву, я вахтнахьанра сагъ апIуз шлуб дар. Яв суратнан ва йиз дердерин гиришрар йитIну, аьхиримжи халачи убхураза, дадайин. Игит адашдин сурат вуйич пну, яв веледари дид’ин жакьвкьана дубсуз гъидритур», – гьарай гъябгъюра балин дердну дачIаркIнайи дадайи.
2014-пи йисан эвлемиш гъахьи Тимуризна дугъан уьмрин юлдаш Дисанайиз кьисматну сар риш ва шубур жили веледар тувну. Гьяйифки, аьхиримжи балик дугъан уларкьан куркIундар – бицIир, адаш дукIну, кьюб гьяфтайилан бабкан гъахьну.
Хаин душмни гъардшиз улупу зулмиз жаваб туври, бицIину чвуччву Мягьямадди Украинайин сяргьятариин чан жан гьяйиф апIурадар. Хъа кьялану гъардаш Самури вари кIажар вахтниинди дюз дапIну, гъюрайи кепкарин гъайгъушнаъ ади, сабпи нубатнаъ Тимурин йитимариз ва хпириз Дербентдиъ юкьуб хулан хал гъадабгъну, ва гьамус миди вуйи пенсия-йин, льготарин кагъзар дюз апIбан гъаразнаъ а.
Гъит ихь закурин мясляаьтнан ва ислягьвалин йигъ бадали, «Эскервалин жюрэтлувализ лигну» I ва II дережайин, «Сирияйиъ кIулиъ гъубшу дявдин операцияйин иштиракчи», Суворовдин, Жуковдин, «Дирбаш’вализ лигну» медалариинди ва гьамус Кьягьялвалин ордендиинди лишанлу дапIнайи адаш веледариз гьаргандиз игитси нумунади гъузри. Дурарин гележег акуб, сагъуб ва бахтлуб ибшри!
