Гюльнара Мягьямедова
Йишвну 14-пи августдиъ Мягьячгъалайиъ гъабхьи бедбахтвалин дюшюшди вари уьлкейин агьалйирин кIваз аьзаб тувну. Вари терефариан ихь багъри Дагъустандихъди дерд-суза зигурайидари чпин дерин пашманвалин кагъзар, чпихьан шлу кюмекар хътаура. Экспертари пашман дюшюш хьувалин себебарикан чпин фикрар ачухъ апIура. ЦIа кабхъувалин хатIасузвал уьбхбан цирклин эксперт Константин Калужинди гизаф инсанар гъирмиш шлу бедбахтвал арайиз гъюрувалин себебарикан гъапну.
Экспертдин фикриинди, Мягьячгъалайин автосервисдиъ цIа кабхъували чахъди швнубна саб тIуркIувалар арайиз гъахну. Гизаф кьадар инсанар гъийихну, зийнар духьну больницйириъ айидарин кьадар хъана артухъ ву.
Пашманвалин дюшюш арайиз гъюбан сабпи себеб – шагьур тикмиш апIбан къайдйир чIур апIувал ву, фицики газдин заправка инсанар яшамиш шлу хуларихьан ва жара дараматарихьан 35 метр манзилнаъ ерлешмиш дубхьну ккунду.
Узу уьлкейин гизаф шагьрариъ гъахьундаршра, пуз ккундузузки, Мягьячгъалайиъси шагьрин кьялаъ, инсанар яшамиш шулайи аьхю хуларин багахь заправкйир дивнайи шагьрар гьичра адаршул. Мисал вуди хураза, учу ляхин апIурайи Китабарина журналарин чапханайин лап багахь шубуб заправка хьа, хъа саб заправкайин гъвалахъ 18 мертебайин хулар тикмиш дапIна. АЗС-арин эйсйирин тямягь аьхюб ву. Инсандин нефсдиин гъалиб хьуз читин ву, кIури шулу. Хъа гьюкмин, шагьрин кIулиъ айидар наанди лигура?
Кьюбпиб, цIа кабхъувал заправкайиин гъабхьундар, автосервисдиъ гъабхьну. «Автосервисдиъ цIа гьапIуз кабхънуш, себеб аьгъю дапIну ккунду. Шубубпиб, варитIан асасуб, аьхю кьадар инсанариз зарар хьувал – цIа гизаф хатIалу шейъ вуйиваликан гьархну, вари инсанар, телефонарра хьади, цIа алабхънайи йишв видеойиз адабгъуз жаргъури гъушну», – къайд апIура Константин Калужинди.
Дугъриданра, ихь Да-гъустандиъси телефонариин машгъул духьнайи инсанар гьич саб йишваъра адаршул. Мектебдин сабпи класдиз гъягъюрайи бицIирихьнара кмиди учвтIан аьхю телефон тувра. Гьадму телефондихъди тамшир апIбакан фикир апIури, баяр-шубарин кIулиъ дарсар учIврадар. БицIидариз чпин таярихъди тамшир апIуз аьгъдар.
Аьхиримжи йисари Дагъустандиъра машинар дишагьлийири хъауз хъюгъна. Думу харжи ляхин дар, амма мисал хураза: остановкайихъ дийигънайиган, кми-кмиди рябкъюри шулзуз: дишагьлийи саб хилиъ руль бисура, тмунуб хилиъ – телефон. Артистари машин хъапIри, чпихъди улхурайидарихъди прямой эфирар гъахура. ДумутIан аьхю хатIалувал шулинхъа? Учвуз ичв жандикан, хизандикан фикир ктарш, рякъюн гьяракатнан тмуну иштиракчйириканкьан фикир апIинай. Саб хилиъ кьюб «хумурзаг» мидисанай. Учвук кайи дирбаш’вал жара ляхниъ улупай.
Мягьячгъалайиъ гъабхьи завалихьна хътакурхьа. ТIубкIувалин кьуватнан кьадар Мягьячгъала шагьрин гьатму кIулиъ гъабхьи тIубкIувалин сес Каспийск шагьриъ яшамиш шулайи инсанариз ебхьували субут апIура.
«Кидикьнайи газдинна гьавайин тIубкIувалин температура лап аьхюб ву. Гьяйифки, гъургу зийнар гъахьи инсанарин кьадар цIиб дар. Бедендин хамран аьхюну пай дубгнайи инсанариз медицинайин кюмек туврашра, дурар сагъ апIуз лап гъагъиди алабхъиди», – гъапну экспертди.
Гьамциб аьгьвалатнаъ зийнар гъахьидариз кюмек туву игит жигьилариз, гьяракатниинди операцияйин столихъ дийигъу духтрариз чухсагъул мялум дарапIди гъибтуз шулдар. Дюн’яйиъ, хъа асас вуди ихь Дагъустандиъ, чIуру инсанартIан дирбаш, чпи жан гьяйиф дарапIди жарариз кюмек тувуз гьязур вуйи инсанар гизаф а.
Хъа ухьуз варидариз му завал дарс дубхьну ккунду. Эгер гьарсар ватандашди, жвуваз гъазанж бадали, къанун чIур апIури гъахьиш мицисдар бедбахтвалар хъана давам хьиди.
