Зубайдат Шябанова
Гъябгъюрайи йисан 4-пи июндиъ Табасаран райондин аьтрафариин федеральный экспертарин иштираквал ади 1-пи туризмдин форум гъябгъюрайи вахтна Пенза шагьриан вуйи дизайнер Вадим Сафоевди Табасаран райондиз чан терефнаан туризмдин логотип гьязур апIруваликан мялумат тувнийи.

Магьа гьаму йигъари Урусатдин архитекторарин союздин вакил Вадим Сафоев Табасаран райондиз хялижвди гъафну ва райондин глава Мягьямед Къурбановдихъди гюрюшмиш гъахьну.
Дизайнери логотипдиъ табасаранарин хусусивал атIабгна – халачйирин рангар ва накьишар, гьацира райондин туриствалин асас машгьур йишвар – Хянягъ гъулан багахь нирин шид убсрайи йишв ва Ургур чвуччвунна сар чуччун гъала.
«Аьхиримжи йисари туризмдин цирклин артмиш’вализ ухьу мюгькам фикир тувуз хъюгънайивал варидиз ачухъди рябкъюра. Логотип – му гьадму циркил улихь гъябгъру сабсана гам гьисаб ву. Ухьуз райондиз цIийи инвесторарин ва туристарин фикир жалб апIувал лапра важиблу вухьуз. Туризмдин циркил артмиш хьуз хъюбгъювалиинди цIийи лихру йишвар арайиз гъюру, гьадму гьисабнаан шагьрариз удучIвну гъягъюрайи жигьиларин кьадарра исина апIуз мумкинвал шулу. Ухьуз думу важиблу вухьуз. Ихь райондин хялижв Вадимдиз логотип гьязур апIбан жягьтлувал улупбаз чухсагъул мялум апIурхьа. Мушваъ сарун дугъан гьякьикьи дустар а», – гъапнийи дизайнерихъди вуйи гюрюшдиъ Мягьямед Къурбановди.
Табасаран райондин главайин туризмдин месэл-йирин цирклиан кюмекчи Низами Агъаризаевди ич сюгьбатнаъ къайд гъапIганси, Вадим Сафоевди райондин туризмдин логотипар швнуб-саб гьязур гъапIнийи. Дурарикан райондиз варитIан багахьди хас вуйиб гъядябгъну, дидин ихтиярарин кагъзар гьязур гъапIну. Арайиъ гъийитIу йикьрариин биналамиш духьну, логотипдин авторвалин ихтиярар Табасаран райондин физический культурайин, спортдин, туризмдин ва жигьиларин ляхнариз лигру управлениейихьна тувну.