Зубайдат Шябанова
Дагъустандин глава Сергей Меликовди Украинайиъ гъябгъюрайи хусуси метлеб айи дявдин операцияйиъ кечмиш гъахьи гьарсар ихь эскер гьаммишан юкIвариъ гъузруси кIваин уьрхбан бадали, дурар яшамиш шули гъахьи хуларик эскрариз бахш вуйи кьулар керхбан къарар адабгъну.
Думу къарар республикайин главайи 2023-пи йисан 7-пи майдиъ СВО-йиъ гъийиху эскрарин хизанарихъди гъабхьи гюрюшдин кьяляхъ кьабул гъапIнийи. Думуган Сергей Меликовди гьарсар эскер яшамиш шули гъахьи хуларик думу кIваинди уьрхбан кьул кебхрувалин гьякьнаан гаф тувнийи.
Къайд апIуз ккундучуз, Дагъустандин главайи думу къарар кьабул апIайизтIан Табасаран райондиъ СВО-йиъ кечмиш гъахьи 44 эскрин гьюрмат уьбхбаз кьулар керхна.
Мидланра гъайри, 21-пи августдиъ гъабхьи райондин депутатарин Собраниейин нубатнан дару заседаниейиъ Табасаран райондин администрацияйин финансарин управление-йин кIулиъ айи Зейфулла Рашидовди къайд гъапIганси, Мягьямед Къурбановди багарихьди райондин бюджетдин дакьатариан 13 гъулан мектебариз СВО-йиъ гъийиху эскрар кIваин уьрхбан кьулар керхуз пул деебтувал табшурмиш гъапIну.
«Райондин ерли бюджетдиан ихь игит эскрар кIваин уьрхбаз дурар урхури гъахьи мектебариз гьарубдиз аьлава вуди 10 агъзур манат жара апIурача. Багарихьди кIваин уьрхбан кьулар Арак, Гурихъ, Халагъ, Хянягъ, Кьюракк, ХустIил, Пилигъ, Вечрикк, Хюрикк, Цухтигъ, Жулжагъ, СертIил гъуларин ва 1-пи нумрайин Хючна гъулан лицейиъ керхру. Райондиъ саки 60-рихьна эскрар дийихна. Учу дурар сарра кIваълан гьаърадарча. Дурарин игитвал, ватандиз вафалувал, дирбаш’вал аргъаж шулайи наслиз намуналу дарс ву. Фунур эскрикан улхурушра, вари, ужударигъян варитIан ужудар гъядягъганси, ватан ккуни, дустрахъан жан тувуз гьязур вуйи баяр гъахьну. Хайлиндар узуз багахьди таниш вуйзуз. Дурари саки варидари, чпин гъвалахъ хъайи жара эскрарин уьмур убхюрча кIури, чпин жанар тувну. Табасаран баярин дирбаш’вал вари уьлкейиз ва вари душмнариз машгьур гъабхьну. Райондин гьарсаб кIваин уьрхбан кьулик игитрин сурат ка. Хъа игитар гьархруб дар», – гъапну ич сюгьбатнаъ Зейфулла Рашидовди.
