Умгьанат Сулейманова
Гъубшу гьяфтайиъ, 19-пи августдиъ, Табасаран райондиз РД-йин сагъламвал уьбхбан министр Татьяна Беляева ва министерствойин вакилар гъафнийи. Дурар райондиз гъюбан асас метлеб – Кьибла Дагъустандин районарин ва шагьрарин кьялан больницйирин кIулин духтрарихъди сагъламвал уьбхбан министерствойин яркьу коллегия кIули гъабхувал вуйи. Табасаран райондин администрацияйин конференцйир гъахру залиъ кIули гъубшу серенжемдиъ, дуфнайи хяларилан савайи, Табасаран райондин кIул Мягьямед Къурбанов, райондин ЦРБ-йиъ лихурайи вари духтрар ва гъулариъ айи медицинайин гъуллугъчйирра иштирак гъахьнийи.
Совещаниейин эвелиъ министерствойин пишекрари вахт ккимиди чпихьна райондин больницайиан хъадайин справкйири бинайиин алди, Табасаран райондиъ сагъламвал уьбхбан цирклин аьгьвалатдиз кьимат тувнийи. Дурари чпин улхбариъ медицинайин ерли пишекрарикан райондин агьалйирихъди диспансеризация гъабхбаз, профилактика бадали вакцинйирин рубар йивбаз ва тарагъру уьзарин улихишв гьадабтIбаз асас фикир тувуб ккун гъапIнийи.
Министр Татьяна Беляевайи чан удучIвну улхбаъ райондин больницйир лабораторйирин диагностика апIру цIийи алатарихъди ва авадлугъарихъди тямин дапIну ккуниваликан гъапнийи.
– Агьалйирин сагъламвал уьбхювал мюгькам апIбан бадали, вари жюрейин шартIар яратмиш апIбак пай киврайидар сабпи нубатнаъди райондин кIулиъ айидар, РД-йин сагъламвал уьбхбан министерство ва райондин медицинайин гъуллугъчйирин коллектив ву. Хъа гъийин йигъаз думу ляхник варитIан аьхю пай кивур ЦРБ-йин улихьдин кIулин духтир Мирзамягьямед Мягьямедов ву. Дугъу регьбервал туврайи вахтна больницайи гъазанмиш дапIнайи хъуркьуваларикан ктибтури гъабхьиш, гизаф вахт гъябгъюру. Табасаран райондин больница Дагъустандин ужударсдар больницйирин сабпи жергейиъ ади, швнуд-сад йис ву. Магьа, ухьуз гъи рябкъюрайиганси, больница лазим вуйи кадрйирихъди тямин апIувал, дидин материалинна техникайин бина яркьу ва ижми апIувал, сагъламвал уьбхбанна профилактикайин, санитарияйин ляхин кIули гъабхувал мушваъ заан дережайиъ а. Чухсагъул больницайин кIулин духтир Абсеретдин Мирзабеговдизра. Гъи му касди, саки 50 йисан райондин больницайин кIулин духтирди гъилиху Урусатдин лайикьлу духтир Мирзамягьямед Мягьямедовди чаина табшурмиш гъапIу идарайин ляхин, улихьдин баркаллу аьдатар давам апIури, дурар хъана ужуди ккабалгуз чалишмиш шула, – заан кьимат тувнийи министри.
Совещаниейин аьхириъ Татьяна Беляевайи инсанарин сагъламвал уьбхбан бадали намуслу зегьмет зигурайи пишекрар министерствойин гьюрматнан грамотйир ва жара пешкешар тувбиинди лишанлу гъапIнийи.
Сагъламвал уьбхбан министерствойин коллегия ккудубкIбалан кьяляхъ узу райондин ЦРБ-йин кIули айи Абсеретдин Мирзабеговдикан, коллегия райондиъ гъабхуваликан фициб мянфяаьт гъабхьнуш, ктибтуб ккун гъапIнийза.
– Йисак саб ражари министерствойин коллегия шулу. Ва гьар йисан гьамци, саб йишваз уч шули, думу жюрбежюр районариъ, шагьрариъ кIули гъабхуру. Коллегия гъабхбан му къайдайи ерли духтрариз чпин ярашугъарин тажрубайихъди таниш хьуз, цIийиб дубгъуз, муниципалитетдиъ сагъламвалин цирклиъ айи месэлйир гъитIирккуз мумкинвалар тувру.
– Коллегияйиъ уву кIулиъ айи больницайин ляхниъ ужувлан терефнахъинди дигиш’валар духьнайивал къайд гъапIнийи. Хъа вушра ляхниъ нукьсанвалар, камивалар адарди даршул…
– Гьелбетда, а. ВаритIан аьхю нукьсанвал – 2007-пи йисан ккебгъу ва гъира ккудубкIну адру поликлиникайин кьюбпи корпус ву.
– Хъа думу ккудубкIуз гьаз мици кьан апIура?
– Улихьдин порядчикди проектдиъ улупнайи вахтназ ккудубкIурза дупну, кучIал гъапIнийи, ва гьаддихъанмина, пул адарди, гьамци гъубзну. Гьамус Татьяна Беляевайи поликлиника давам апIбан бадали, думу республикайин ва федеральный программйирик кипуз кюмек апIурза гъапну. Дидланра савайи, райбольницайиз цифровой рентген жара апIузра гаф тувну. Министр дуфнайи вахтна Гали Гюгьрягъ гъулаъ ФАП-ра ачмиш гъапIунча. Думу ццийин йискан ихь республикайиъ ачмиш гъапIу сабпи ФАП ву.
— Умуд кивурхьа вуш, министри чав туву гафар к1улиз адагъур, к1ури. Увуз ва яв коллективдиз ляхниъ хъуркьувалар ишри.
