Мейлан Нежефов
Хьадан шубуб вазлин тятIилар аьхирихъна гъюри ва цIийи урхбан йис ккебгъри, урхурайидарин, мялимарин, бицIидарин багъариъ тербия туврайидарин фикрар-хиялар ва гевюлар адашвури, чиб дурар аьдати уьмрин къайдайихъна гъюз гьязур шула.
– Цци Хив райондиъ урхурайидарин кьадар 2329 кас, хъа бицIидарин багъариъ 509 бай-риш хьиди. Цци мектебдиз 183 касди чпин сабпи гам алдабгъиди. Хъа ГИА тувру выпускникарин кьадар 350 кас хьибди.
Гъит дурариз ужудар сяътар ва урхбан цIийи йис ягъурлуб ибшри! Райондин вари мектебариъ ва бицIидарин багъариъ ширар ва гьякар йивувал ва жара расвалин ляхнар аьхирихъна духна. Хив гъулан «Солнышко» кIуру бицIидарин багъдиъ гъабхурайи расвалин ляхнарин 80 процент кIулиз адабгъна, – къайд апIура райондин образованиейин отделин кIулиъ айи Назаряли Тарлановди.
Сар бицIир мектебдиз ликрилан кIул’ина гьязур апIуз фицдар харжар ахьраш ахтармиш апIури, узу урхурайидарин абйир-бабарихьна илтIикIнийза. Йиз сюгьбатчйирин жавабар жикъиди макьалайиъ тувраза.
– Ав, цIиб улихьнаси дарди, гъи мектебдиз гьаъру бализ ва шураз саб жар палат гъадабгъуз фукьан вушра читин дубхьна. Асккан кIул 10-15 агъзур манат пул ккунду. Гьяйифки, гъи мектебдиз саб жар палат цIиб ву. Фицики мектебариъ палатдин саб жюрейин кIалиб амдар. Гьаддиз баяр-шубариз чпиин ужуз кьиматнан вуйибра алди ккундар. Хъа гъабхьишра, абйир-бабарин гьятдизди гъванар-кIекIлар ахьри, «йиз классдиъ Маралин ликариин кьюд агъзур вуйидар ал», пиди, хъа тмунури, «ич классдин Хатунагъин кофтайин кьимат шубуд агъзур манат ву», кIури, бомбар йивидивуз. Гъи веледариз абйир-бабарихьна нач-гучI амдар, я хулан гъазанмиш апIувал ва мадар фициб вуш, дурари аннамиш апIури амдар. Дурариз ккунди айиб анжагъ чпин план уликкна хуб ву. Баладайи гьа, урхубра гьаддиз гъилигуб вуйиш, – кIура цци 7-пи классдиз риш удучIвурайи Хив гъулан агьали Закир Везировди.
– Йисан кIулиъ, гъюрайи туристарихъди вуш, даршсан пенсияйиин, маважибдиин кьюб аьбаси иливган вуш аьгъдарзуз, туканчйири масу туврайи алабхьру-илдибтрубдик, ипIру-убхърубдик ктукьуз шулдар. Хъа гъи ихь республикайиъ саб артухъ мадар апIуз шлуб фу ахъа? Гьич фукIара. Жвуваз вазли гъюрайи маважиб 15 агъзур манаттIан дар. Валлагь, гъи мектебдиъ урхурайир, закур колледждик, вуздик кучIвну, студент гъахьи кас уьрхюб фукьан вушра читин дубхьна. Хъана шюкюр ибшри Аллагьдиз, гьаму пособйир тувуз хъюгъювализ ва дурар гъадагъуз амур апIурайивализ. Яна, думу дайишра, ухьу веледар дюрюрхри дайхьа гьа. Амма пособйирин кюмек гъабхьундайиш, марцциди улдубдуйи халкь. Хъана аьхю чухсагъул гъи, вари йишвариъси, ихь райондиъра ачмиш дубхьнайи фонд «Инсандиз», Халкьдин Собраниейин депутатариз ва жара цирклариъ лихурайи ватандашариз.
«Велед мектебдиз гьязур апIин» акцияйин шилнаъди мурарикан, чпин мурад-метлеб саб вуйивалиан сабхилди кюмек гъабхьиган, увлан аьхю гъагъ алдабхъура, – ктибтура цци сабпи классдиз бай гьаърайи Мажвгул гъулан агьали Селимбег Жалиловди.
