Гюльнара Мягьямедова
Рякъярин мяишат – уьлкейин экономикайин важиблу циркларикан саб ву. Хъа рякъяр тикмиш апIрудари чпин улихь дивнайи планар вахтниинди тамам апIувал хъана важиблу ву.
Октябрин 16-пи йигъан Урусатдин Президент Владимир Путин ва Дагъустандин Глава Сергей Меликов Р-217 «Кавказ» трассайин цIийи алапIнайи участок ачмиш апIбаъ иштирак гъахьну. Машинар гъягъру думу рякъ варихалкьарин транспортдин «Кафари – Кьибла» коридорин саб пай ву.
Гьюкуматдин кIулиъ айир серенжемдиъ видео-конференцияйин аьлакьайиинди иштирак гъахьнийи.
«Дагъустандиъ Р-217 «Кавказ» трассайин участок кьюб жерге машинартIан гъягъруб дайи, гьамус думу рякъюъди юкьуб жерге машинар гъягъюра. Уьмуми ярхишин 274 километр вуйи машинар гъягъру «Кавказ» рякъ Владикавказдиан Грозныйдианмина Мягьячгъалайиз гъябгъюра, дилин тина Азербайжандихъди вуйи сяргьятарихъна удубчIвура.
Ухьу гележегдин мяна айи «Кафари – Кьибла» коридор лазим вуйиси яркьу апIури, Мягьячгъалайин, Хасавюртдин, Дербентдин гъирагъарихъан гъягъру рякъяр дапIну, думу трасса цIийи алапIбан ляхин давам апIидихьа. Улихьнаси узу Азербайжандин президентдихъди гьаму месэла гьял гъапIнийза. Думу объектар къайдайиз хувал гъунши гьюкуматдизра важиблу ву. Чпин терефнаанра дурари лазим вуйиси ляхин гъабхура», – къайд гъапIнийи Владимир Путинди.
Дагъустандин яшайишдинна экономикайин артмиш’вализ, гьадму гьисабнаъди республикайин аьтрафариин рякъяр тикмиш апIбаз фикир тувбаз, Сергей Меликовди Урусатдин Президент Владимир Путиндиз чухсагъул мялум гъапIнийи.
«Гъи учу машинар гъягъру Р-217 «Кавказ» рякъюн кьюб участок, уьмуми манзил 8,3 километр, ачмиш апIурача. Рякъюн цIийи алаънайи йишвар ачмиш дапIнайи туриствалин маршрутарин терефариъ а», – гъапнийи Сергей Меликовди.
Рякъюъди гъягъру машинарин кьадар за хьувалиан (сад йигъанна йишван арайиъ 35 агъзур машин), рякъ лап чIур дубхьнайи, думу чарасуз рас дапIну ккундийи.
Сергей Меликовди чан улхбаъ къайд гъапIганси, рякъяриъ машинарин гьяракатнан хатIасузвал за апIувал ва рякъюъди гизаф машинар гъягъюз мумкинвал арайиз хувал – му асас месэла гьял апIуз гъабхьн.
Серенжемдин аьхириъ Сергей Меликовди рякъяр тикмиш апIрударин баркаллу зегьметназ чухсагъул мялум ва дурар пишекарвалин машкврихъди тебрик гъапIнийи.
