Шюшеханум Керимова
24-пи октябриъ Дербент шагьриъ айи халкьарин сяняаьткарвалин ва туризмйин колледждиъ милли культурайин ва чIаларин йигъаз бахш вуйи серенжем кIули гъубшну. Мяракайиъ му колледждин мялимар, студентар, азербайжан театрин пишекар, Дагъустан халкьдин лайикьлу артист Севда Бейболаева, шаир, журналист Шюшеханум Керимова иштирак гъахьну.
Серенжем кIули гъабхурайи колледждин директорин заместитель (тербияйихъди вуйи ляхнин) Наида Уьсмановайи ихь дагълу халкьарин ирснакан, чIаларин девлетлуваликан, халкьарин сяняаьткарваларикан ктибтну. Бабан чIалар ахтармиш апIувалиъ алахьурайи читинваларикан, дурар уьрхбан бадали хизандин айитI бабан чIалназ фикир тувну ккуниваликан му колледждин урус чIалнанна литературайин дарсар киврайи, табасаран риш вуйи Зумрият Ражабовайи ктибтну.
«Табасаран райондин «Табаса-рандин сес» газатдиъ лихурайи йиз сижар Фарзилат Ражабовайи чан гъарашугъарихъди му райондиъ айи агьалйирихьна илтIикIури, чпин баяр-шубариз бабан чIал ахтармиш апIбаз фикир туврудар агру вахтна, 30 касдикан 12 касди чпин багъри чIалнахьна маракьлувал айиб, думу ахтармиш апIбаз фикир тувуз гьязур вуйиб тасдикь гъапIну», – давам гъапIну Зумрият Аьбдулмежидовнайи.
Му тешкилатдиъ математикайин дарсар киврайи Имамат Мясумовайира чIаларихьна вуйи маракьлувал артухъ дапIну ккунибдикан, багъри чIална урус чIал, багахь хьайи гъуншйирин чIаларра аьгъяди ужу вуйибдикан гъапну.
«Узуз йиз багъри лезги чIалси, табасаран чIалра аьгъязуз. Узу табасаранар яшамиш шулайи Хив райондин Хив гъул’ан вуза ва рягьятди чIалра гъудубгъунза», – гъапну чан улхбаъ Имамат Мюгьюдиновнайи.
Гьаму вахтназ халкьарин сяняаьткарвалин ва туризмйин колледжиъ 500 балина шуру аьгъювалар гъадагъура ва дурарихъди гьар йигъан ляхин гъабхури, чпиз аьгъюб улупури, 50-тIан артухъ мялимар мушваъ лихура. Дупну ккундуки, му бюджетдин тешкилат ву. Наида Тажудиновнайин гафариинди, мушваъ лихурайи мялимар тажруба айи, чпин пишейихъ юкIв хъайидар ву.
Дурарикан сар, технологияйин дарсар кивру, РФ-дин сяняаьткарвалин образованиейин лайикьлу пишекар Багьадер Агъаева ву.
«Ухьу ихь милли культурайиинди, багъри чIалариинди девлетлу вухьа. Жвуван чIалнахьна вуйи маракьлувал артухъ апIури гъабхьиш, ихь писателарихъди, артистарихъди мицдар гюрюшар тешкил апIури гъахьиш, ихь баяр-шубарин чIалнахьна вуйи фикир артухъ шул кIури хиял вуйиз», — гъапну чан улхбаъ Багьадер Аьлисардаровнайи.
Кьибла Дагъустандиъ айи вари чIалариз, милли культурайиз фикир тувну ккунибдикан, аьхиримжи вахтна шагьриъ айи милли театрариъ лихурайи артистарин пишекарвалин дережа за шулайиваликан му йигъан аьхю тажруба айи, 30 йисантIан артухъ му колледждиъ директорин вазифйир кIули гъуху, гьамусяаьт методистди лихурайи Урият Ибрагьимовнайи ктибтну.
Мяракайиъ иштирак гъахьидар аьхю аьшкьниинди ихь чIалниинди узу гъурху шиърарихъ хъпехънийи. Гьацира, Севда Бейбалаевайи азербайжан чIалназ таржума дапIнайи «Кьарнийир» кIуру мяълира мяракайин иштиракчйириз кьабул гъабхьнийи.
Лезги чIалниинди вуйи Етим Эминдин «Дустариз» кIуру мяълийира му йигъан уч духьнайидар ихь милли чIалар кьадар адрубкьан уткан вуйибдин гъавриъ аъну шул кIури, хиял вуйиз.
Му тешкилатдиъ 40 йисантIан артухъ вахтна ляхин апIурайи, студент шубариз гьалвар, халачйир, кюмсар урхуз улупурайи РФ-дин образованиейин лайикьлу пишекар Афисат Гасаевайихъдира таниш гъахьунза. Мугъан кабинетдиъ 4 аьхю дуркьаригъ гьалвар диришну, урхуз хъюгъну айивали юкIв шад гъапIнийиз. Гьацира, цIибди бицIи дуркьарихъ деънайи дишагьлийира йиз Вечрикк гъул’ан вуйи, бицIидихъанмина му пише дидрипди гъузу, 5-пи разряддин халачачи Гюльпери Гьясанбегова вуйи. Мугъу гьалав жюрейииндина кут айи халачи жюрейиинди убхурайи Дагъустан республикайин герб ккудубкIури айи.
Гьацира, мушван кабинетариъ, коридорарикк шубари дурхнайи бицIи гьалвар, кюмсар, халачйир гизаф айи. Йиз фикриан, ихь багъри чIалар, милли культура ва ухьуз айи халкьарин сяняаьткарвалар дургидар, дурар имдарди гъахьиш, ихь яшайиш мянасузуб хьибди.
