Наргиз Гюлечова

18-19-пи ноябриъ Индияйин Мумбай шагьриъ ачухъ гьавайихь воркаут спортдиан вари дюн’яйин чемпионат кIули гъубшну. Думу чемпионатдиъ кьюд йигъандин арайиъ хайлин гьюкуматариан 160-тIан артухъ спортсменар иштирак гъахьну. Гьадрарин арайиъ Урусатдиан вуйи командайин дахилнаъди ихь ватанагьли, Хив райондин Мажвгул гъул’ан вуйи ва Мягьячгъалайиъ яшамиш шулайи Рамазан Гьяйдаровра а.

 

Чемпионатдиъ спортсменар швнуб-саб категорияйиан талитназ удучIвнийи.
Душваъ иштирак гъахьи ихь ватанагьли му спортдин жюрейиан 3 ражари Дагъустандин ва 2 ражари СКФО-йин чемпион духьнайир ву. Хъа му ражари Рамазан вари дюн’яйин чемпион гъахьну, ва думу чемпиондин чIулиинди, пулин дакьатариинди ва гьацира медаларна кубкйириинди лишанлу гъапIну.
Рамазан Гьяйдаровдихъди вуйи ич сюгьбатнаъ дугъу къайд гъапIганси, кIули гъубшу чемпионатдиъ дугъу тамам гъапIу элементар читиндар ву: турникдиин «самолет» жюрейиинди тIубариин дугъужвуб, саб хилиинди гьавайихь элерхну дугъужвуб ва хъанара гьацдар жарадарра.

«Узу йиз бицIи вахтарихъанмина спортдиин машгъул вуйза. 22 йисандин яшназ лигну, спортдиан хайлин натижйирра айиз. Гьамусяаьт тренер хьпан бадали, Дагъустандин гьюкуматдин педагогвалин университетдиъ физкультурайин факультетдиъ урхураза.
Гьарганси гьамусра му чемпионатдиз гъягъруган, узуз йиз гъалибвал ккун апIурайидар гизаф айибдикан мялум вуйзуз ва дурарин узхъанди юкIв убгувал гьисс апIурайза. Гьаддиз сифте йиз адашизна дадайиз, хъасин вари имбудариз чухсагъул пуз ккундузуз.
Хъа аргъаж шулайи наслариз пуз ккундузузки, гьаммишан спортдиин машгъул хьуб ва улихь дивнайи месэлйир кIулиз адагъуб гьарурин чарасуз вуйи метлеб вуди дубхьну ккунду», – аьлава гъапIну чемпионди.