Зубайдат Шябанова
Гъябгъюрайи йисан Табасаран райондин Арак гъулаъ цIийи ФАП ва Халагъ гъулаъ духтрарин цIийи амбулатория дивуз планламиш дапIна. Мидланра гъайри, Дарвагъ гъулан ФАП-ра бинайиан рас апIиди.
Му мялуматдин гьякьнаан Табасаран райондин глава Мягьямед Къурбановди къайд гъапIганси, вари расвалин ва тикилишчивалин ляхнар сагъламвалин сифте вуйи медицинайин кюмек тувру цирклин модернизацияйин программайин дахилнаъди гъахуру.
«ЦIийи ФАП-ар деврин вари алатарихъди тямин апIиди, душвариъ лихурайи медицинайин вакилариз ва пациентариз деврин тIалабариз жаваб тувру вари шараитар яратмиш апIиди.
2019-пи йисхъанмина башламиш дапIну учу райондиъ сагъламвалин 20-дихьна дараматар рас гъапIунча. Амма ляхин гьеле ккудубкIнадар. Рас апIру ФАП-ар ами. Гьаддиз му цирклин месэлйир бегьемди гьял апIайиз хайлин ляхин дубхну ккунду», – гъапнийи райондин главайи.
ИкибаштIан, му хабар гъеебхьу ФАП-арин ва амбулаторйирин кIулиъ айидарра рази гъахьну.
«Ужуб хабар ву. Чухсагъул. Халагъ гъулан амбулатория 1991-пи йисаз ФАП-си либхурайи. Гьадму йисхъанмина думу духтрарин амбулаторияйиз илтIибкIну. Узу 1996-пи йисхъанмина гьамушваъ лихураза. Гъийин йигъан ич амбулаторияйи бицIи гъуларра кади 14 гъулан агьалйириз медицинайин сабпи кюмек тувра. Хъа му гъулариъ 3 агъзуртIан артухъ инсанар яшамиш шула. Амбулаторияйин дахилнаъ багахь гъуларин 10 ФАП-ра а. Учухь гьар йигъан силбар сагъ апIру духтир, бицIидарин духтир ва участокдин терапевт духтир, медицинайин кьялян 6 пишекар ва 3 марццишин къайдайиъ уьбхру вакилар лихура. Райондин центральный больницайиз гъулхьан саки 15 километр манзил а. Духтрарихьна душну гъюз варидарихьан шулдар. Учхьан кюмек апIуз даршлу аьзарлуйир тяди кюмек тувру машиндиъди райондин больницайиз гъахурча. Сабпи кюмекназ вуйи дармнар вари гьуркIну ачуз. Му сабпи тереф.
Кьюбпи месэла – дарамат. Гъи, дугъриданра, амбулаторияйин хулар лап гъагъи гьялназ дуфна. Дурар улихьдин йисари совхозарин хулар вуди гъахьну. ШибритI ипнайи йишвхьанра камиди цалар дутIуркIну, гъи-закур гьадахьрубси йирси духьна. Му дараматдиз учу жара йишв адруган адаънийи. Медицинайин компьютеризация гъабхайиз амбулатория анжагъ саб кабинеттIан адру йишваъ ерлешмиш дубхьнайи. Хъа гьамушваъ духтрарин шубуб ва процедурйир гъахру кабинет, тегьлиз а. Амбулатория цIийиб, деврин вари тIалабариз жаваб тувруб тикмиш апIуру кIуру хабар гъеебхьиган, медицинайин вакиларси, вари жямяаьтра рази гъахьну. Му ужуб хабар багахь гележегдиъ кIулиз удубчIвур кIури, миж кивдихьа», – гъапнийи ич сюгьбатнаъ Халагъ гъулан амбулаторияйин кIулин духтрин вазифйир тамам апIурайи Юсуф Гюлягьмедовди.
