Декабрин 23-пи йигъан Дагъустандин Глава Владимир Васильевди Правительствойин хулариъ Урусатдин Федерацияйин ва Дагъустан Республикайин гьюкуматдин наградйир тувбан серенжем кIули гъубхну. Аьдат вуйиси, ЦIийи йис улубкьайиз улихьна образованиейин, экономикайин, культурайин, искусствойин, илимдин, спортдин, гъулан мяишатдин цирклариъ, гьацира ватанпервервалин тербия тувбаъ, гьюкумат тикмиш апIбаъ, сагъламвал уьбхбаъ ва ватандашарин уьмриъ ислягьвал мюгькам апIбаъ, дугъри гъуншивал уьбхбаъ, рягьимлувалин ляхин гъабхбаъ асас вуди лишанлу гъахьи инсанарин зегьметназ кьимат тувну.

 

Дагъустандин Главайин хил’ан ихь ватанагьли, Дагъустандин гьюкуматдин педагогвалин университетдин Дагъустандин тарихдин кафедрайин заведующий, профессор, тарихдин илмарин доктор Мягьямед Гьясановдиз «Дагъустан Республикайин улихь лишанлу хьпаз лигну» орден тувну.

Мягьямед Ражабович, яв зегьметназ лайикьлу кьимат тувувал мубарак апIури, увуз мюгькам сагъ’вал, ярхи уьмур ккун апIурача.

 

«Табасарандин нурар» газатдин коллектив