Зубайдат Шябанова
Аьхюну пай дишагьлийирин назуквалинна гъюдли назвалихъ ижми ва ихтибарлу хасият ва бина хъа. Гьацир ву гьаму шиклик учвуз рякъюрайи Сабина Мирзабеговара. Сабинайин хал мани гьиссарин гьавайи, умунвали, шаду бицIирин сесери абцIна. Санкт-Петербург шагьриъ Росгвардияйиъ сержантди лихури, дугъан гьаму йигъари 5 йис шула. Гьаммишан хусуси палатдикди, жиларин коллективдиъ гъуллугъ апIувал думукьан гьии ляхин дар. Амма Сабинайиз чан ляхин кьабулди ву. Дугъ’ан вари удукьура: Росгвардияйиъ гъуллугъ гъабхувалра, дадайин вазифйирра, яратмишарихьна вуйи аьшкьра.
«Узу мектебдиъ урхурайи йисарихъанмина адашди учу ватандихьна ккунивалиинди, аьхюдарихьна гьюрмат ади тербияламиш гъапIнийи. Адаш Каспийск шагьриъ РОВД-йиъ лихури гъахьну. Думу учуз нумуна вуйчуз ва гьаммишан дугъ’инди дамагъ апIуйча. Йиз кIваъ гьарган, адашси, военный гъуллугъчи хьуз кьаст ади гъабхьнийиз», – ктибтура Сабинайи чан хизандикан.
Сабина Мирзабегова Хив райондин Чювекк гъул’ан Каспийск шагьриз кючюрмиш гъахьи Тагьироварин хизандиан ву. Дугъан адаш Музанфар Каспийск шагьриъ РОВД-йин майор, хъа дада Гюльжейран хулан ляхнариин машгъул вуйи. Сабинайиз кьюр чве ва кьюр чи а. БицIину чве Рамазан гьамусяаьт, Ватандин маракьар уьрхюри, Украинайин ругариин хусуси метлеб айи дявдин операцияйиъ иштирак шула.
Каспийск шагьрин 4-пи нумрайин мектеб ужудар аьгъювалариинди ккудубкIну, Сабина Мягьячгъала шагьриъ ДГПУ-йин социальный педагогикайин ва психологияйин факультетдик урхуз кучIвнийи. Диплом гъадабгъбан кьяляхъ думу Санкт-Петербург шагьриз гъягъюру.
Ич сюгьбатнан эвелиъ Сабинайи, табасаран дишагьлийириз хас дару му пише чав фици ктабгънуш, ктибтнийи.
«Йиз чве Гьямзатди Санкт-Петербург шагьриъ Росгвардияйиз ляхниз гъягъюз теклиф дивган, узу дишлади рази гъахьнийза. Росгвардияйин гъуллугъну дишагьлийикан ужудар аьгъювалар ва жара башкъа мумкинвалар ккун апIура. Мисалназ, тапанчийиан ва жара яракьдиан йивуз аьгъяди ва бедендин ужуб гьязурвал ади ккунду. Узу пишекарвалин аьгъювалариан, сабурлувалин дурумлувалиан ва фидакарвалиинди зегьмет зигбаан сар жилижвуванра кьяляхъ гъузрадарза. Хъа иллагьки гьамциб ляхниъ дишагьлийин хасиятнан лишнарра дюрхну ккунду. Ляхинра, хизанра ялгъузди кIули гъабхуб думукьан гьии ляхин дар. Хъа бахтлу гележегдихьна вуйи рякъюъ чан гъванар шулу. Гьаддиз йиз кIваъ айи хиялар тамам дархьи гагьдихьан гъюнариин али гъагъ пучIу апIуз ккундарзуз. Узуз йиз ляхин гизаф кьабулди вузуз. Амма веледдихъди узуз ккунибкьан вахт адапIуз мумкинвал адрували кIвак гъалабулугъ кипрайиз. Му терефнаан йиз абйир-бабарикан аьхю кюмек азуз. Дурариз чухсагъул.
Дугъриди гъапиш, вари дишагьлийир кьувватлудар, ижми хасиятнандар ву. Ухьу арабир ухьуз айи мумкинваларикан ва удукьуваларикан фикиркьан апIурадархьа. Назук машнан кIалбарин, гьиссари ацIнайи уларин кьяляхъ кьувватлу ва кьастнан ижми инсан хъади шулу. Хъа гьадихъди сабси, мюгьюббатназ, гьюрматназ ва дамагъ апIбаз лайикь вуйи дишагьлийирин гьякьикьи юруш, сурат ва хасият дубгуз гъитрадархьа. Гьаддиз узуз аьхю аьшкьниинди йиз дада, чйир, дарсар киву мялимар, йиз гъулан ва вари табасаран дишагьлийир улубкьурайи 8-пи Мартдин машкврахъди тебрик апIуз ккундузуз. Сагъвал ва бахт, девлет ва берекет, кIван умунвал ва ислягьвал ичв хулариъ гьаммишан гъубзри», – кIура Сабина Мирзабеговайи.
Учура Сабина ва военный гъуллугънаъ айи вари ихь дирбаш дишагьлийир машкврахъди тебрик апIурача.
