2019-пи йисан 28-пи декабриъ Табасаран райондин Хючна гъулан стадиондин айитI «БицIи бюджетдин спортдин майдан» кIуру проектдин сяргьятариъди цIийиди тикмиш дапIнайи спортдин майдан ачмиш гъапIну.

 

Шадвалин му мярака вахтназ вуди Табасаран райондин главайин заместителин вазифйир тамам апIурайи Рамис Уьсмановди ачмиш гъапIнийи. Дугъу жикъиди райондиъ гъягъюрайи тикилишчивалин гьяракатарикан хабар тувнийи. Аьхиримжи вахтна Табасаран райондиъ юбилейин сяргьятариъди 40 объект тикмиш гъапIну ва апIура.

Му майдандин проектдин автор ва руководитель Дагъустан Республикайин жигьиларин Министерствойиъ жигьиларин центрин директорин заместителди лихурайи Марат Рягьимов ву. Му проект Жигьиларин ляхнарин федералин агентствойиъ Урусатдин грантарин конкурсдиъ гъалиб гъабхьну. Грантдиз пулин кьадарниинди 2 300 000 манатдин кюмек тувну.

Шадлугънан серенжемдиъ жара йишварианра хайлин хялар иштирак гъахьнийи, дурарикан сар – Москва шагьриан дуфнайи, «Локомотив» командайиъ футбол уйнамиш апIурайи Тимур Сулейманов вуйи. Дугъура Хючна гъулан жямяаьт спортдин майдан ачмиш апIбахъди тебрик гъапIнийи.

Спортдин майдан ачмиш апIбан шадлугънан серенжемдихъди аьлакьалу вуди, футболиан дуствалин турнирра кIули гъубшнийи.