«Табасарандин нурар» – гьарсаб хизандиз

Магьа нубатнан йисра аьхирихъна гъафну. Аьдат вуйиганси, гьарсар касди йисандин арайиъ чав гъапIу ляхнин натижйир йивури шулу. Саб фунуб-вуш ляхин тамам апIуз дархьидарра а, хъа жара, фикриъкьана адру хъуркьувалар, вая шаду ясана пашман дюшюшарра улулуркьу кас гьеле-мелера адаршул. Амма гъи йиз сюгьбат жарабдикан вуйиз…

 

Гъийин девир аьламатнан мялуматар, махлукьатлу хаб-рар, аьхю нириз, зурба лепейиз ухшар ади, бицIи вахтнан арайиъ вари дюн’яйиз тарагъурайи девир ву. Дурар тарагъбаъ электрондин, интернетдин дакьатари аьхю роль уйнамиш апIура. Фукьан ухьу чарйир гъизигишра, гьяфтайиъ саб ражари чапдиан удучIвурайи газатар электрондин вая интернетдин дакьатарихъ хътруркьруб аьгъяхьуз. Му аьгьвалатну газатарин мумкинвалариз аьхю тясир апIура. Дурариз муштарйир цIибтIан дихъури амдар. Фицики газат хилиз рубкьайиз, агьалйириз дидик кайи мялуматар ва хабрар ухдитIан деерхьнади шулу. Гьаци вушра ухьуз газатдихьан ярхла хьуз затра ихтияр адархьуз. Гьаз? Гьаз гъапиш, милли газат ухьуз ихь абйир-бабарихьан гъубзнайи, жвуван халкьдин биналу литературайин чIал, миллетдин тарих, культура, аьдатар уьрхюрайи, жвуван ватандашарин уьмрикан, хъуркьуваларикан, баркаллу зегьметнакан, игит ляхнарикан, ватанпервер тербияйикан хабар туврайи, халкьдин ирснахъди, сяняаьткарваларихъди, машгьур устадарин хилари арайиз гъахи алатарихъди таниш апIурайи багьалу савкьат ву.

«Табасарандин нурар» газатдиз 2020-пи йисаз вуйи подпискара магьа аьхирихъна гъафну. 100 агъзурихьна табасаранар яшамиш шулайи республикайиъ газатдин подписка гъапIдарин кьадар гъябкъиган, лап мюгьтал ва пашман гъахьнийза. Хайлиндари кюмек апIуз гаф тувнийи. Туву гаф кIваинди тамам гъапIдарра а, хъа чпиз газатдикан кюмек ккунди амдруган, йирфар улупдарра гъахьну. Улихьна йисари газатдиз подписка дапIну, думу вахтниинди почтальонари чпихьна дурубкьрайивалиан подпискайихьан ярхла гъахьидарра а. Почтайин тешкилатдин гъуллугъчйир тахсиркрар вуди, гиранвалар газатдикан ва жвуван ватандашарикан – журналистарикан дапIну ккундар. Почтайин бязи вакиларин ляхнихъди учура рази дарча. Ва улихьна йисариси, гьамусра учвкан ккун апIурача – эгер газат учвухьна вахтниинди рубкьури адарш, газатдин редакцияйиз зенг апIинай. Ичв зенгнан кьяляхъ, му ляхин къайдайиз рягьятди хуз хьибдийи.

Подпискайин кампания аьхирихъна гъафнушра, думу таза кIул’ан цIийи йисан апIуз шулу. Гьаддиз учу, подписка апIувал ккун апIури, табасаран халкьдин гьарсар вакилихьна илтIикIурача. Подписка апIбаъ учуз Табасаран ва Хив районарин, Дагъ.Огни ва Дербент шагьрарин администрацйирин главйир, культурайин, образованиейин управленйирин начальникар, бицIидарин багъарин, пенсйирин фондарин, больницйирин, гъуларин клубарин, библиотекйирин, мектебарин, теат-рин, гъуларин поселенйирин администрацйирин вакилар кюмекчйир духьну ккунду. Газатдин машариан тина ихь халкьдин хъуркьувалар, неинки Дагъустандизси, вари Урусатдизра тарагъура.

Ктабхъу йисан редакция-йин коллективди ихь ватандашарин арайиъ швнуб-саб конкурсар, конференцйир, рягьимлувалин акцйир гъурхну. Думу серенжемариъ варжариина ва артухъ инсанар иштирак гъахьну. Гьадму жюрейин ва жара серенжемар улубкьурайи йисанра текрар апIидихьа.

Учвкан ккунди айиб анжагъ газатдиз подписка апIувал ву.

«Табасарандин нурар» газатди яв бицIи ватандикан, багъри гъулан тарихдикан, душваъ шулайи гьядисйирикан ва серенжемарикан, майил-мадатарикан, яв гъуншдикан, яв коллективдикан маракьлуди бикIура. «Табасарандин нурар» гьаммишан агьалйирихъди аьлакьайиъ шулу. Дидиъ «Яв баяр, Табасаран», «Редакцияйин хялижв», «Халкьдин мелзналан» ва жара рубрикйир тIаъна. Газатдиз агьалйирихьан кагъзарра гъюри шулу. Учу дурарин месэлйирихъ дикъатлуди хъпехъурача, ва газатдин редакцияйиан мина хайлиндариз лазим вуйи кюмек гъибихъну.

Республикайин «Табасарандин нурар» газатдин редакцияйин бинайиинди Дагъустандин жюрбежюр гъуллугъарин вакиларихъди, улихь-кIулихь хьайи машгьур касарихъди, хъуркьувалар гъадагъу спортсменарихъди, аьлимарихъди, духтрарихъди, дилаварчйирихъди ва бажаранлу жара ватандашарихъди конференцйир гъахбан тажруба жара милли газатаризра кьабул гъабхьну. Му цирклиан учву ихь ватандашарихъди таниш апIувалин ляхин давам апIидича. Газат анжагъ дидиъ лихурайи вакиларинуб дар, думу халкьдинуб ву. Ухьу жара милли газатарин кьяляхъ гъудрузбан бадали, учвура дидик пай кивну ккунду. Сабпиб – подписка апIбиинди, кьюб кIуруб – ичв теклифариинди.

Жара халкьарин ва миллетарин улихь ихь халкьдин сабвал ва сатIивал зяиф даршулайивал гьаддиинди улупурхьа. Хъа сабвал айи халкь гьаммишан кьувватлуди ва гьюрматлуди гъубзру.

Гьюрматлу ватанагьлийир! Ичв улубкьурайи ЙIийи йис мубарак ибшри! Гъит, ичв хизанариъ сабвалин, сагъ’валин, саламатвалин манишин затра зяиф дарибшри. Амин!