Умгьанат Сулейманова
Дюз кьюд йисна шубуб ваз дубхьна Украинайиъ ккебгънайи хусуси мяна айи дявдин операцийиан хажалатнан хабрар гъюри. Дурарикан ихь газатариъра чап апIурахьа. Магьа хъанара нубатнан хажалатнан хабар дуфна: Ватандин ва хизандин гележегдин гъайгъушаъ айи бицIину сержант, десантник, 27- йис яшнаъ айи Рамалданов Имран Закировичди Ватан бадалди чан жан фида гъапIну.
Имран Дагъ. Огни шагьриъ 1997-пи йисан бабкан гъахьну. Мирзакеримов Абрик Аьгьмедовичдин ччвурнахъ хъайи 7-пи нумрайин мектеб ккудубкIну, думу Дагъ. Огни шагьриъ ерлемиш дубхьнайи аграрный техникумдиъ урхуз кучIвру. Яшар бегьем гъахьиси, техникум ккудубкIу Имран чан хушниинди армияйиз гъягъюру. Дугъаз Псков шагьриъ гъуллугъ апIуб кьисмат гъабхьну. 76-пи нумрайин гвардияйин десантдинна гьюжмин дестейин частнаъ гъуллугъ апIурайи дугъу душваъ, бицIину сержант ччвура гъадабгъну, контракт йибтIуру. Миржид — урчIвуд йисан Ватандин жюрбежюр сяргьятарихъ гъуллугъ апIуру. 2019-пи йисан Сирияйиъ гъягъюрайи дявдин женгариъра иштирак шулу, ва дугъаз, дявдин женгнан ветеран ву кIури, пешкешар, хайлин грамотйир ва медалар тувнр.
Ухьуз мялум вуйиганси, десантникарин кьушмар гьарвахтна дявдиъ улихь хьайидар ву. Ва 2022-пи йисанра Украинайиъ гъябгъюрайи хусуси мяна айи дявдин операцияйиъ сабпи йигъланмина улихь жергйириъди шагьрар, гъулар, районар азад апIбак чан аьхю пай киву жюрэтлу Имран Рамалдановдин аьхиримжи гафар «ухьу душмнар дармадагъин апIидихьа» гъахьну – 2023-пи йисан 8-пи октябри Киевдин аьтрафарихъ дугъу чан жан фида апIуру. Имран Рамалданов жигьиларин яшнаъди «Кьягьялвалин ордендин» сагьиб гъахьну.
Му ляхникан хабар дубхьну, узу цIийина Имран Рамалдановди гъурху 7-пи нумрайин мектебдин директор Хадижат Аьбдулселимовнайихьна илтIикIунза. Ва дугъу узуз гьамциб мялумат тувну. «Имранди учухь гъурхнийи. Гъира хайлин ич мектеб ккудубкIдар хусуси мяна айи дявдин операцийиъ иштирак шула. Магьа мектебдиз, садпи йигъарихъанмина думу операцияйиъ иштирак шули, чан жан фида гъапIу Мирзакеримов Абрик Аьгьмадовичдин ччвур тувна. Ухьуз мялум вуйиганси, дявдиъ иштирак шулайидар я кьяляхъ гъиди, ясана Ватан бадали дурари чпин жанар фида апIиди. Хъа жилижвувар халкьдин гъайгъушнаъ айи ихь вакилар ву. Мицисдар игит баяр аьхю дапIну арайиз адагъу дадйириз ухьу чухсагъул дупну ккунду. Думу дявдин операция ккебгъу вахтна, баяр душваз гъюгърубра аьгъяди, гъалабулугъдикк ккадрахъди, сабурлуди насигьят тувну, «ужуб рякъ ибшричвуз, жан баяр» гъапи дадйириз аферин кIурхьа.
Ухьуз пеълин чирккв гъабкIи вахтна, саб мутму гъудубгу вахтна хажалат шулхьуз. Хъа веледар аьхю дапIну, тербия тувну, гъи магьа абйир-бабари дурар накьвдик кивуб – мициб ляхин фици аьгь апIуру? Хъанара текрар апIурза: душваъ иштирак шулайи баярин абйир-бабариз Аллагьди сабур туври.
Мицир игит бай аьхю гъапIу Фаридайиз ва Закиризра аьхю сабур туври. Ав, Имранра кIваъ хиялар, метлебар-кьастар имиди, бегьем яшарра дархьиди уьмриан гъушну. Учуз учу дарс киву баяр-шубар вари багьалу вучуз. Хиял мапIанайки, мектеб-мялим ву сарун, дупну. Гьадму абйир-бабариз кайи дерд учузра качуз. Гьамус сарун чIуру хабрар лап кьит духьна. Ин ша Аллагь, ухьу тербия туву ихь вари дирбаш жигьил эскрар гъалибвал хьади кьяляхъ гъюр пну, умуд кивидихьа».
Му пис хабар гъеебхьган, узхьан дишла Имрандин абйир-бабарихъди аьлакьайиз удучIвуз гъабхьундарзухьан, хъа саб-кьюб ваз улдубчIвган, Имрандин дада Фаридайихъди телефондиан гафар-чIалар гъапIнийза. «Узу думу хабрихъ гьич хъугъундайза, йиз бай отпускназ дуфнайиган, фикир мапIан, дада, учу сарун варитIан читин йишвариан удучIвунча, хайлин шагьрар, районар, гъулар азад гъапIунча. Узу варитIан читин женгариъ ади гъахьунза. Хъа сарун багарихьди гъалиб духьну кьяляхъ гъидича, гъапнийиз бали», – ишури, кдибтну Фаридайи.
Дугъриданна, Имран гъакIну кIури хабар гъафиган, бай аьгъю касари, язухъ зигури, думу фицир дирбаш кас вуди гъахьнуш, текрар апIуйи. Фицир гъахьнушра, ухьуз имбуб сарун анжагъ дугъкан ва дугъан кьягьялваликан вуйи аку фикрар, дугъан гафар ва дугъан шикил ву.
