Мейлан Нежефов
Гьаму йигъари Хив райондин чIатар-чIурарин ччвурар, тарихи йишвар, табиаьтдин ядиграр ва гьацира кюгьне накьварин шибар ва дурариъ дидикIнайи марцци келимйирин бикIбар ахтармиш апIури, РД-йин культурайин ирснан ядигарар уьрхру агентствойин кIулин пишекар ва эксперт ва тарихдинна медениятдин ядиграр уьрхру республикайин ГБУ-йин регьбер Руслан Гьяжиев гъафнийи.
Ахтармиш’валин ляхнин мурад-метлеб фу вуш, узухьна хяларди гъафиган, кьюрид баярихьанра гьерхуб-хъерхуб гъапIнийза.
«Гьар хьуд йисак ич идара-йиан гьаму жюрейин топонимикайин сиягьар гьязур апIуб, хъа улихьна йисари дапIнайи сиягьар таза алаури, дурарин арха-бинайин тарих хъана маракьлуди ахтармиш апIуб учуз тувнайи бирмиш-буйругъ ву. Метлеб гьадму вуки, гьарсабдин жа-жаради шиклар йивури, кIанакк дидкан кьатI’и мялумат тувуб. Гьязур гъабхьи материалин гьякьнаан гележегдиз китаб адабтIуз ният айич. Гьяйифки, гъи саб бязи гъулариъ айи агьалйир вая улихь-кIулихь хьайидар ихь тарихнан ядиграрихьна, накьварихьна гьюрматсузди яшамиш шула. Ихь уьлкейиъ дурар улдушвури, уьргъюри, вижна ктарди дурарихьна илтIикIурайи дицдар касарин 2002-пи йисхъанмина 25-пи июнди №73-ФЗ нумрайиккди удубчIву указдиъ журум апIузра къарар адабгъна. Учура думу къарарниин къул дизигну, гъубшубдин гъадри ва гъавриъ адру касар суракь апIури, дурарин гьякь диван апIуз вари чарйир агурача», – гъапнийи Юсупди.
Сюгьбат давам апIури, Русланди къайд гъапIнийи: «Гъи Урусатдин вари пIипIариан Дагъустандиз тамаша апIуз варжариинди туристар гъюра. Хъа дурариз сифтена-сифте гьаму учу гъабхурайи ляхникан ву неззет кайиб. Уч гъахьи материалариинди учу туристический маршрутдиз картара гьязур апIурача. Гьаддиз ккун апIурза, ихь элугълийирикан чпиз мялум вуйи аьгъювалар учухъди пай апIури, му ляхниз бакар хьуб. Ухьухь кIури шулу: «Эгер инсандиз чан ккудубшуб аьгъдарш, дугъан гъюзимбубра гьаддиз гъилигуб шулу». Дугъриданна, ихь ккудубшубдин гъайгъушнаъ ухьу духьну ккун. Aбйириланмина ухьухьна дурубкьнайиб закурин насларихьна лазим вуйи къайдайиинди ухьу дурубкьну ккун. Гьаци дархьиш, абйирин рюгьяриз мидкан хабар хьиди, ва дурари ихь гъафилвалилан хил алдадабгъур.
