Гюльнара Мягьямедова

Рамазандин ваз мусурмнариз варитIан гирами ваз ву. Думу вазлин ужудар аьдатарикан саб багахьлуйириз, гъуншйириз, касибвал кайи инсанариз ушв дибиснайи йигъан ригъ алабхъбан кьяляхъ ушв гьибтуз теклиф апIуб ву. Му ислам диндиъ савабнан ляхин ву. Гьаддиз уьлкейин гизаф йишвариъ миллетар ва халкьар сатIи апIру ифтарар гъахура.

 

Апрелин 6-пи йигъан Дербентдиъ Низами Гянжявийин ччвурнахъ хъайи паркдиъ Дагъустан Республикайин Глава Сергей Меликовдин ччвурнахъан республикайин ифтар кIули гъябгъиди. Думу серенжемдиъ мусурман республикйир вуйи Бангладешдиан, Малайзияйиан, Пакистандиан, Казахстандиан, Мавританияйиан, Ирандиан, Иракдиан, Турцияйиан, Узбекистандиан 16 посол ва Урусатдин МИД-дин гьюкуматдин департаментдин кьюр вакил иштирак хьпанди ву.
Ифтарин иштиракчйирин улихь Мугьяммад Юсуфди, Бараа Масудди, Султан Трамовди, «Нашидуль Ислам» дестейи нашидар урхиди ва Дербентдиъ 4-5-пи апрелиъ кIули гъубшу Вариурусатдин хафизарин конкурсдин гъалибчйириз пешкешар тувди .
Ифтариз дуфнайидарин улихь Дербентдиъ айи фонтандин шоу кIули гъябгъиди, хъа мажлисдин аьхириъ умра-гьяждиз вуйи путевка шлиз удубчIвуруш, тупут ипди.

***
Москвайиъ айи «Рамазандин чадриъ» Дагъустандин вечер кIули гъубшну. «Рамазандин чадур» гирами ваз ккебгъхъанмина ачмиш дапIнайиб ву. Душваъ гьар са-саб йигъ Урусатдин саб субъектдиз, ясана мусурман саб уьлкейиз бахш дапнIа. Дагъустандин ифтариз 500-тIан артухъ хялар гъафну. Дурарин арайиъ РФ-дин Федерацияйин Советдин член Ильяс Умаханов, Урусатдин Игит Энвер Набиев, РФ-диъ айи дуставалин уьлкйирин посолар, диндин вакилар, жямяаьтлугъ ва политикайин кеспагьлийир, студентар, жигьилар ва гьацира жарадар айи.
СВО-йин иштиракчйир ва дурарин хизанар программайин гьюрматлу хялар гъахьнийи.

***
Апрелин 7-пи йигъан УнцIукул райондиъ «Ахульго» комплексдиъ Сергей Меликовдин ччвурнахъан ифтар тешкил апIиди. Душваъ Кавказдин дявдин варитIан чIатху женгарикан саб кIули гъубшнийи, хъа гъи душваъ чвевалин халкьарин арайиъ айи дуствалин лишан вуйи ядигарин комплекс ерлемиш дубхьна.
Гьаму жюре серенжем гъубшу йисанра тешкил гъапIнийи. Думуган ушв гьибтуз агъзуриинакьан инсанар гъафнийи.

***
27-пи мартди Астрахандиъ табасаран миллетдин ифтар кIули гъубшну. Душваъ дагъустандин вакиларра иштирак гъахьну.
Табасаран миллетдин ифтар 31-пи мартдиъ Каспийскдиъра кIули гъубшну. Душваъ Йемендиан вуйи гьяфиз Ибрагьим Аьгьмад Зубайджи, Ансар Рамазанов, Шябан Салигьов, Ризван Гьябибов ва гь.ж. иштирак гъахьну.

***
Ушварин машквар къайд апIбахъди аьлакьалу вуди, апрелин 10, 11 ва 12-пи йигъар республикайиъ ляхин дарапIру йигъар вуди тяйин дапIна.