Гюльнара Мягьямедова
Гъубшу жвуми йигъан, 5-пи апрели Мягьячгъалайиъ шадлугънан серенжемар гъахру «Королевский дворец» залиъ табасаран дишагьлийириз вуйи лавландин ушв гьибтувалин аьхю мажлис-ифтар кIули гъубшнийи.
Серенжемдиз вахт ккимиди гьязур хьуз хъюгънийи. Мицисдар мяракйир гъахруган, хайлин харжар апIуб алабхъуру. Гьаддиз тешкиллувалин вари ляхнар республикайин муфтиятдиан Табасаран ва Хив районариан вуйи Фатима Аьлиевайиз ва Хадижат Аьбдурягьмановайиз табшурмиш дапIнайи.
Серенжем ккебгъайиз кьюд йигъ ккимиди, мажлис тешкил апIбан ляхнар фици кIули гъягъюраш суракь апIури, газатдин журналист Наргиз Гюлечовайи Хадижат Аьбдурягьмановайиз телефондиан зенг гъапIнийи. Кюмекнан хил гьачIабккуз гьарган гьязур вуйи ич журналист Наргиз Гюлечова спонсорвалин кюмек тешкил апIуз даягъ гъахьну. Серенжем гизаф ужуди тешкил дапIнайи. Уткан залиъ учIвру йишвахь табасаран милли хурагар (нитIиф, аварши али уьл, варждин галар, шюрйир, ацIу цIикаб, гъибирку кIурицI ва гьацдар жарадар) дивнайи стол албагнайи. Ккунидариз шиклар йивуз кьюб фотозонара гьязур дапIнайи. Ифтариз дуфнайи гизаф шубариин ихь табасаран дишагьлийири алахьру лизи келяргъйир, бицIидариин милли палтар алийи.
Муфтиятдин мярифатнан дишагьлийирин отделин терефнаан удучIвну гъулху Ирина Аьлиевайи ислам дин арайиз гъюваликан, пайгъамбар Мугьяммаддин (с.аь.в) сагьябарин кюмекниинди ислам дин фици тарабгънуш, гъи мусурман дин хъапIуз ккуни чвйириз ва чйириз саб жюрейин манигъвал адруваликан гъапнийи. «Гьадму ляхнин улихь хьайир ихь республикайин муфтий Аьгьмад Афанди Аьбдуллаев ву. Дугъу республикайин агьалйир сатIи апIувалихъан, ихь дагълу юрднаъ ислягьвал уьбхювалихъан, жигьилар дюз рякъюъ тIаъбахъан гьаммишан юкIв убгура», – гъапнийи муфтиятдин вакили.
Серенжемдиъ муфтиятдин Табасаран райондиъ айи мярифатнан дишагьлийирин отделин кIулиъ айи Фатима Аьлиева, Хив райондин вакил Хадижат Аьбдурягьманова удучIвну гъулхнийи. Дурари Аллагьдикан гьаму гирами вазли гьарсар касдин гъапIу ужудар ляхнар, гъидису ушвар, гъапIу гъудгнар ва дюъйир кьабул апIуб ккун гъапIнийи, уч духьнайидариз диндин гьядисарикан ктибтнийи.
Мажлисдиъ Мягьячгъалайиъ ерлешмиш дубхьнайи Аьбдулгьямид Юсуповдин ччвурнахъ хъайи мектебдиъ урхурайи бицIи шубари нашидар гъурхнийи. Думу мектебдиъ лап бицIивахтнахъанмина диндин аьгъювалар тувра. Чан «Рамазан дуфна, Рамазан» кIуру табасаран чIалниинди вуйи нашид хьади Аьйша-ханумра удучIвнийи.
Лавландин гъудгниз азандин сес гъабхьиган, дюъйир дурхну, уч духьнайидар, чиб-чпин арайиъ сюгьбатар гъахури, ушв гьибтуз хъюгънийи.
