Зубайдат Шябанова

Улихьнаси Табасаран райондин Ярса гъулан мектебдин бинайиин гьадму мектеб ккудубкIу медицинайин гъуллугънан подполковник Агъакерим Исиновдиз «Дагъустандин Халкьдин игит» ччвур тувбахъди аьлакьалу вуйи шадлугънан мярака кIули гъубшну.

 

Серенжемжиъ мектебдиъ урхурайи баяр-шубарилан ва мялимарилан гъайри, райондин депутатарин собраниейин председатель Иса Исаев, райондин образованиейин управлениейин руководителин заместитель Руслан Сефербегов, Агъакерим Исиновдин багахьлуйир, мирасар ва Ярса гъулан агьалйир иштирак гъахьну.

Агъакерим Исинов Урусатдин оборонайин министерствойин военный госпиталиъ хирургди лихура. Дугъу чан военный духтрин вазифйир лайикьлуди Кафари Осетияйиъ, Сирияйиъ тамам апIури гъахьну. Хъа гьамус сабпи йигъарихъанмина хусуси метлеб айи дявдин операция гъябгъюрайи йишваъ гъуллугънаъ а.

Ватанди чан улихь дивнайи буржи намуслуди ва пишекарвалин заан дережайиинди тамам апIурайивализ лигну, ихь кьягьялиз Суворовдин, «Эскрар аьжаликкан ккадагъувализ лигну» ва 2-пи дережайин «Женгариъ лишанлу хьпаз лигну» медалар тувна.

Мектебдиъ урхурайи баяр-шубари уч духьнайидариз ва хялариз маракьлу программа гьязур дапIнайи. Шиърарин, мяълийирин ва ялхъвнарин программа ккудубкIбан кьяляхъ, Агъакерим Исиновди баяр-шубарин суалариз жавабар тувну. Живанари духтрин пишекарваликан, уьмрихьна дугъан лигбакан, образованиейин цирклиъ айи учIру месэлйирихьна игитрин янашмиш’валикан суалар тувнийи.

Серенжемдин аьхириъ Агъакерим Исинов Гъизилин хяд ва тялукь диплом тувбиинди лишанлу гъапIну.