Гьавайиъди гъябгъру транспортдин Федералин агентствойи Урусатдин авиакомпанйирикан Ирандин ва Иракдин, Персидский ва Оман заливарин аьтрафарилан самолетар тIирхуз гъидритувалин тIалаб гъапIну.
«Думу ляхин Ирандин ва Америкайин арайиъ гъалмагъал дубхьнайивалихъди ва завун гимйир тIирхуз хатIа айивалихъди аьлакьалу ву», – гъапну ич мухбириз Мягьячгъалайин аэропортдин вакили.
КIваина хурача, гьамусяаьт Мягьячгъалайин аэропортдиан Тегерандиз самолетарин рейс ачмиш апIбан гьякьнаан мясляаьтар гъягъюра.
