Мейлан Нежефов

Хьадукран призыв давам апIури, Хив ва Агъул районариан армияйиз эскервалин буржи тамам апIуз гъягъюрайи жигьилар гьаму йисан шубубпи ражари рякъ’ин гъапIну.

Призывникарихъди вуйи ватанпервервалин гюрюш Хив райондин Хиварин гъулаъ ерлешмиш дубхьнайи «Гъалибвалин паркнаъ» кIули гъубшнийи. Призывникарин, дурарин багахьлуйирин улихь райондин глава Ярмет Ярметов, Хив ва Агъул районарин военком Сулейман Гьюсейнов удучIвну гъулхнийи. Чпин улхбариъ дурари жигьилариз сагъламвал мюгькам апIбаз улупнайи сад йис намуслувалиинди армияйин гъуллугъ гъабхбаз бахш дапIну ккуниваликан ктибтнийи. Гьацира армияйин жергйириз дих апIурайи жигьилар Украинайин жилариин гъябгъюрайи хусуси метлеб айи операцияйиъ иштирак даршулайиваликан ва кучIлин гафар-чIаларихъ хъугъну даккниваликан кьатI’и мялуматар тувнийи.
«Гьарсар жигьили эскервалин буржи тамам дапIну ккун. Думу ихь ифдиъ айиб ву. Ав, гъи вахт ва уьлке сикин дарували абйир-бабарин ва багахьлуйирин кIвак гъалабалугъвал кипра. Хъа дагъустандиан вуйи жигьилари Урусатдин Яракьлу кьувватарин жергйириъ саб гьамус ваъ, гьарган чпин эскервалин буржи намуслувалиинди тамам апIура. Умудлу вуза жюрбежюр частариан военный комиссариатдиз ва учуз, абйир-бабариз, гьаму дестейиъ айидаризра чухсагъул мялум апIбан кагъзар гъюрубдиин. Жараси хьуб мумкин дар. Гъит дурар Аллагьдиина аманат ишри! Жил’ин ислягьвал, халкьарин юкIвариъ, ужагъариъ архаинвал ва сир-аьлакьайин манишин хьуб ккун апIураза», – гъапнийи армияйиз бай гьаърайи Мирза Наврузбеговди.