Республикайин кIулиъ айирин Халкьдин Собраниейихьна вуйи илтIикIувалин гьякьнаан учу, чпин фикрар ашкар апIуб ккун апIури, политикайин цирклиъ лихурайи табасаран халкьдин бязи вакиларихьинди илтIикIунча. Дурарин комментарйир исихъ туврача.
Алавудин Мирзабалаев, РД-йин Халкьдин Собраниейин промышленностдинна ЖКХ-йин ва транспортдинна рякъярин мяишатдин комитетдин председатель:
«Му ражари республикайин Главайин Послание гьязур апIруган, хайлин ляхин кIули дубхнайиб аьгъю шулу ва гьаз гъапиш дидиъ республикайин уьмрин вари важиблу месэлйир атIагнайи. Ачухъди кIуруш, региондин яшайишдин ва экономикайин гьялнан ва гележегдиз дивнайи метлебарин сабпи ражари вуди стратегияйин анализ дапIнайи. Гьюкмин ляхин кIулиз адабгъру органарин ва ерли самоуправлениейин органарин улихь тялукь месэлйир дивруган, дурар уьмриз кечирмиш апIбан бадали, Сергей Аьлимович гележегдин планариъ айи стратегияйин месэлйириин биналамиш шулайивал рябкъюра. Хъа дагъустанлуйириз варитIан важиблудар, гьелбетки, уьмрин яшайиш ужудар шараитарихъди тямин апIувалин месэлйир ву. Гьадрарин арайиъ агьалйир ерийин штухъди, ужуб жямяаьтлугъ транспортдихъди тямин апIувал, ва экологияйин месэлйир а.
Главайи чан улхбаъ гъитIиркку вари гьаму месэлйир, гьарсар дагъустанлуйин сагъламвалихъди ва уьмрихъдина яшайишдихъди аьлакьалудар ву. Сергей Алимовичди гъапиганси, месэлйир улихь дивна, гьамус дурар гьял дапIну ккунду. Посланиейиъ гъитIиккнайи вари вазифйир ва метлебар кIулиз адагъували ужуб натижа тувур кIури, умуд кивраза».
Сефер Аьлиев, РД-йин Халкьдин Собраниейин экономикайин, политикайин, инвестицйирин ва дилаварчивалин комитетдин председатель:
«Посланиейиъ Главайи республикайин политикайинна жямяаьтлугъдин вари терефариан важиблу месэлйир гъитIиккну.
Ич – парламентдин депутатарин, РД-йин Правительствойин, муниципалитетарин главйирин, жямяаьтлугъдин – улихь важиблу ва кьатI’и месэлйир дивна ва дурар гьял апIру рякъяр улупна. Дурар республикайиз инвестицйир артухъ жалб апIбан, бизнесдин жямяаьтлугъдиз кюмек тувбан, экономика сирниккан ккадапIбан ва жара рякъяр ву.
Главайи чан улхбаъ къайд гъапIу муниципальный реформайикан улхуруш, му ухдитIанмина гьял дапIну ккуни месэла вуйи. Сергей Аьлимовичди асас фикир аьтрафар сабишв’инди артмиш апIбан месэлайизра тувна. Аьтрафарин артмиш’валин ляхнар ихь юрдариз ва халкьарин хусусивализ дилигну кIули духну ккунду.
Республикайин кIулиъ айири гьацира СВО-йин иштиракчйириз ва дурарин хизанариз туврайи кюмек артухъ апIруваликан гъапну. Къайд дапIну ккундуки, майдин сессияйиъ Халкьдин Собраниейи му цирклиан швнуб-саб къанун кьабул апIиди. Саб гафниинди, фтиин лихуруш, ич улихь план хьа».
Мягьямед Къурбанов, Табасаран райондин глава:
«Республикайин Глава Сергей Аьлимовичди Халкьдин Собраниейихьна вуйи чан Послание СВО-йин иштиракчйириз кюмек тувбан месэлйирилан ккебгъувалиин вари рази гъахьнийи. Ухьузра му лап важиблу месэла вухьуз. Хусуси метлеб айи дявдин операция гъябгъюрайи йишваъ Табасаран райондиан швнуд-сад агъзур эскрар айивал варидариз мялум ву.
СВО-йин ветеранариз ва эскрариз гьаму серенжемдиз гьюрматлу хяларди теклиф дапIнайи. Республикайин главайи ихь уьлкейин маракьар уьрхювалик дурари киврайи важиблу пай кIул’инди къайд гъапIну. Дугъу, Урусатдин Игитар ктухури, ихь ватандашар Рустам Мурадовдин, Эседулла Абачевдин, Руслан Къурбановдин ва женгнаъ кечмиш хьпан кьяляхъ му ччвурназ лайикь гъахьи Игит Исрафил Мягьямедовдин ччвурарра гъапнийи.
Му месэла давам апIури, Сергей Аьлимовичди СВО-йин иштиракчйириз жилин йишвар жара дапIну ккунивал къайд гъапIну. Ихь райондиъра му месэла важиблуб ву, фицики, узухьна гюрюшдиз гъюру эскрар саки вари гьаму месэла хьади илтIикIура. Райондиъ гьаму месэла гьял апIбаз ишлетмиш апIуз шлу мулкар а. Дурар ишлетмиш дарапIди дирчнайи республикайин ерли мяна айи жилар ву. Гьадму саб вахтна думу жилар кирайиз тувнийи, хъа гъи дурар метлебсузди ишлетмиш апIура. Дурар кирайиз гъадагънайидарихьан кьяляхъ дидисну, СВО-йин иштиракчйириз тувуз шулу.
Главайин табшуругъниинди республикайин Правительствойи хусуси метлеб айи операцияйин иштиракчйириз ва дурарин хизанариз яшайишдин кюмек тувбан, гьадму гьисабнаан пулсузди жилин йишвар жара апIбан къанундин проект тартиб апIурайивалиин гизаф рази вуза. Думу къанундиъ му месэла фици гьял апIуруш, вари шартIар ва къайдйир хъайи-хъайибси улупиди.
Ярмет Ярметов, Хив райондин глава:
«Сергей Меликовди Халкьдин Собраниейихьна вуйи чан илтIикIбаъ дагъустанлуйирин уьмрин вари цирклариз фикир тувнийи. Дугъу республикайиъ гъийин йигъаз гъазанмиш дапIнайи хъуркьувалар къайд гъапIнийи ва гьюкмин органарин ва депутатарин улихь стратегияйин мяна айи месэлйир дивнийи. Дидланра савайи, республикайин агьалйириз, алвер апIурайидариз ва хусуси метлеб айи дявдин операцияйиъ иштирак шулайидариз кюмек тувбан бадали кьабул апIурайи уьлчмийирин гьякьнаан мялуматар тувнийи. Гьацира, чан улхбаъ республикайин кIулиъ айири асас фикир гизаф бицIидар айи хизанариз ва региондин агьалйирин яшайишдин дережа за апIбаз тувнайи. «Гьаму терефар ухьуз гизаф важиблудар вухьуз, фицики ццийин йис Урусатдиъ Хизандин йис вуди мялум дапIна. Аьсрариинди чан хизандин аьдатар уьрхюрайи дагъустанлуйириз му уьлчмйир юрутмиш апIувалиъ аьхю эгьемият а», – гъапнийи Сергей Алимовичди. Дугъриданра, дегьзаманйирихъанмина дагъустанлуйирин хизанариъ шубуртIан цIиб веледар ади гъабхьундар. Гьаддиз Дагъустандин кIулиъ айири чан улхбаъ къайд гъапIу «Хизан», «Давамлу ва актив уьмур» кIуру милли проектар асас вуди гизаф бицIидар айи хизанарин яшайишдин шараитар дигиш апIбан тереф уьбхюрайидар ву. Думу проектарин дахилнаъди республикайиъ гележегдиъра ляхин давам апIрувалиин узу гизаф рази вуза».
