Зубайдат Шябанова

Майдин аьхиримжи йигъан Табасаран райондин администрацияйиъ райондин глава Мягьямед Къурбановдин регьберваликкди «Каспий» хушлувалин дестейиз контрактдиинди гъягъюз ккунидарин сиягь яркьу апIбан гьякьнаан совещание гъубхнийи.

Табасаран райондин администрацияйин главайин жямяаьтлугъдин хатIасузвал уьбхбан ляхнариз лигру заместитель Ринат Мирзабалаевди чан докладдиъ къайд гъапIганси, цци, январихъан башламиш дапIну, думу дестейин жергйириз райондиан 22 кас чпин хушниинди гъушну.
Дугъу гьацира совещаниейин иштиракчйириз республикайин гьевескрарин «Каспий» батальондин контрактдин шартIарикан, жвуван хушниинди думу дестейиз гъушу баярин ва дураринсиб эскервалин гъуллугънаъ айи жара касарин маважибдин фаркьвал адруваликан гъапнийи.

Рядовой звание айи эскрарин асккан гьисаб 195 агъзур манат, взводдин командирарин – 225 агъзур манатдилан зина, батальондин командирарин – 245 агъзур манатдилан зина маважиб улупна.

2022-пи йисан ноябрин вазлихъанмина чпин хушниинди эскервалиъ учIву жигьилариз военный гъуллугънаъ айидариз улупнайи вари льготйир тувра.
Ринат Мирзабалаевдин докладдихъан Мягьямед Къурбановди мялум гъапIганси, гъуллугъ ккудубкIбан кьяляхъ эскрариз дявдин женгарин ветерандин статус тувру, жвуван хушниинди думу дестйириз гъушу эскрарин хизанаризра яшайиш жигьатнаан кюмек улупна.
Муниципалитетдин кIулиъ айири му цирклиан вуйи ляхин давам апIури, агьалйириз шлубкьан артухъ мялумат тувуб табшурмиш гъапIну.