Наргиз Гюлечова

Дагъустандин марччарин хьа Узбекистандиз масу гъадабгъуз ккунди а кIури, республикайин Правительствойин председатель Аьбдулмуслим Аьбдулмуслимовди мялум гъапIну.

 

Дугъан гафариинди, Узбекистан Республикайиъ кIули гъубшу Урусат Федерацияйин регионарин Советдин заседаниейин дахилнаъди Ташкентдиъ думу ерли премьер-министр Аьбдулла Ариповдихъди гюрюшмиш гъахьну. Узбекистандин пучIу промышленность гьясил апIурайи карханйириз Дагъустандин чарвйирин хьа масу гъадабгъну ишлетмиш апIуз ккунди айивалин гаф-чIал гъапIну.

«Гюрюшнаъ Аьбдулла Ариповди Дагъустандин чарвйир артмиш апIбан цирклиъ гъазанмиш дапIнайи хъуркьувалар ва гьацира меринос жинснан чарвйирин заан дережайин хьайин ад къайд гъапIну.
Пуз ккундузузки, аьхиримжи йисари Узбекистандиъ пучIу промышленность ужуди артмиш шула. Гьаддиз сатIиди хьа тартиб ва мурслар гьязур апIбан бадали, гьадму республикайин премьер-министри Дагъустан Республикайин Правительство-йихъди йикьрар йитIбан гьякьнаан табшуругъ тувна»,

– гъапну Аьбдулмуслим Аьбдулмуслимовди.

КIваин апIурача, улихьна йигъари Дагъустандиъ кIули гъубшу Вариурусатдин жинснан чарвйирин XXIV выставкайиъра Узбекистандин вакилар иштирак духьнайи. Дурар иштирак хьпан асас метлебра, Дагъустандин чарвйирин хьа ахтармиш апIуб вуйи.