Зубайдат Шябанова

Гьаму йисан Табасаран райондиъ 14 километр манзилназ марцци штун турбйир зигурайивализ лигну, райондин Ярса ва Зил гъуларин 400-дихьна хулар убхъру штухъди тямин апIуз мумкинвал шулу.

 

Проектариъ тартиб дапIнайи ляхнариз 59 миллион манатдин харжар удучIвура.

Гъубшу 2023-пи йисан думу проектдиз гьюкуматдин экспертизайи ужуб кьимат тувну. Торгйир мялум гъапIу вахтна, улупнайи пулин кьадар 52 миллиондихьна ис гъапIну ва, подрядчик фуж шулуш, мялум гъахьну.
2023-пи йисан штун турбйир зигуз республикайин инвестиционный программайин дакьатариан чарасуз лазим вуйи пуликан саб пай – 25 миллион манат жара гъапIнийи. Думу пулин кюмекниинди подрядчикди саб кьадар ляхнар тамам гъапIну, пул варибдиз гьубкIри адрувализ лигну, ляхин вахтназ дебккну.

Цци РД-йин Халкьдин Собраниейин 31-пи майди гъабхьи сессияйиъ думу проектдин месэла гьял апIуз гьубкIри адру пулин дакьатарра (27 миллион манат) жара апIуз къарар адабгънийи.
Багарихьди райондиз думу пулин дакьатар рукьиди. Думуган подрядчикди чан вазифйир давам апIиди ва тикилишдин ляхнар улупнайи вахтназ ккудукIиди.

Гъулар убхъру штарихъди тямин апIувалин месэла Табасаран райондин глава Мягьямед Къурбановди чан гюзчиваликкна гъадабгъна. Штун турбйир зигру йишвариина, гъахурайи ляхнарин ери ахтармиш апIбан бадали, инспекцияйин дестейихъди кми-кмиди думу учв гъягъюри шулу.